Kryeministri Edi Rama u shfaq sot, ashtu sikundër edhe pritej, në mbrojtje të Kryebashkiakut Erion Veliaj dhe çdokujt tjetër të përmendur në përgjimet e publikuara së fundmi, si pjesë e dosjes së antimafies italiane, ndaj disa dhjetra anëtarëve të ‘Ndragheta-s.
Rama nuk zhgënjeu, gjeti armiqtë e brendshëm, që sipas tij po baltosin Shqipërinë, ndërsa mori rolin e kahershëm, atë që bën sa herë publikohen skandale: të hetuesit, prokurorit dhe gjyqtarit.
Media dhe opozita u identifikuan si pjesa e së keqes, rilindasit si engjëj, ndërsa Rama vetë u shfaq si atdhetari që nuk kishte hallin e baltosjes së Qeverisë, Rilindjes, 99-ace, Mjaftistëve, por të Shqipërisë.
Kryeministri zgjodhi të japë mesazhe të qarta edhe ndaj SPAK, ku sot është depozituar një padi ndaj Kryebashkiakut Erion Veliaj, por që për Kreun e Qeverisë edhe 1 mijë të tilla sikur të depozitohen i shërbejnë llumit dhe baltosjes.
Po kështu Rama zgjodhi të sjellë një shembull mbi atë se çfarë i ka ndodhur atij kur ishte Kryebashkiak, kur kishte dalë një foto me një person, i cili më pas e përdorte fotografinë e tij, lidhur me sigurimin e firmave nga pronarët e trojeve, për të siguruar ndërtime.
Pra me pak fjalë, Kryeministri, pas një heshtjeje 4-5 ditore, bëri atë që pritej: të zhvlerësonte ne maksimum përgjimet e publikuara, njëlloj sikundër ka bërë me çdo skandal që është publikuar më parë.
Pyetja që Edi Ramës nuk i bëhet është sepse në përgjime dalin vetëm Rilindas apo të majtët? Si ka mundësi që të përgjuarit, pra ata italianët, të njohin kaq mirë burrat e zyrtarëve, kryepolicë dhe kryebashkiakë, të dijnë lidhjet e tyre, madje të përcaktojnë edhe sa vlejnë?
Pavarësisht paralelizmave që bën, apo shprehjes se “Partisë Socialiste i marrin të keqen”, është fakt se në përgjime shfaqen vetëm emra të së majtës.
Kjo ndodhi me Tahirin, Xhafajn, Veliajn, të tre pjesë e qeverisjes së Edi Ramës.
20 % që thuhet sot nga përgjimet e antimafies nuk është një term i ri, pasi në Shqipëri, ka vite që flitet, pavarësisht se është vështirë të provohet, të paktën mediatikisht.
Kohë më parë një prej ndërtuesve në këtë vend ka denoncuar publikisht faktin se në Tiranë, i është kërkuar një shumë 1 mln dollarëshe për një leje ndërtimi, ndërsa akuza i drejtohej Kryebashkiakut të asaj kohe. Denoncimi prodhoi një debat politik, mazhoranca e drejtuar nga PD në qeverisjen e vendit, i kërkonte llogari kreut të opozitës së asaj kohe, dhe çudia zgjati vetëm 3 ditë.
Pse nuk ka ndodhur bie fjala që në përgjime të shfaqen emra Kryeministrash, kancelarësh apo kryebashkiakësh të vendeve të tjera, ku potencialet për të pastruar para, qoftë edhe të ‘Ndraghetas është shumë më i madh.
Ndoshta nuk ndodh pasi është e vështirë që të peshkosh kaq lehtë sa në Shqipëri zyrtarë të cilët i gënjen edhe me sallam.
Dhe kjo nuk është faj i medias, as i opozitave, pavarësisht se kush është në atë rol, por i qeverisjes, që nuk ka vepruar edhe kur ka pasur denoncime.
Përgjimet e anti-mafies, edhe sikur mos kenë asnjë vlerë ligjore, apo të jenë dokrra, sikundër i quan Kryeministri, të paktën zbulojnë atë se ky vend trajtohet si Kalabria e viteve 1960 dhe kjo për një qeveri normale duhet të jetë një kambanë alarmi.
Ato personazhe që janë përgjuar nga antimafie mund të mos kenë asnjë vlerë, mund të mos kenë kontaktuar asnjë politikan apo zyrtar në Shqipëri, mund të mos kenë arritur të realizojnë planin e tyre, por të paktën zbulojnë profilet e disa zyrtarëve që mund të blihen edhe me djathë, sallam apo mish derri.
Dhe kur një kryepolic gënjehet me këto produkte, sikundër flitet në përgjime, atëherë kupton sepse ajo struktura e policisë që ai komandon, mbyll sytë përballë paligjshmërive të tjera.
Rama sot citoi të paktën 4 herë konkluzionet, sikundër ai i cilësoi, të dosjes së antimafies italiane, në një tentativë për ti mbushur mendjen çdokujt se ajo që thuhet atje, pra ai procesi i pastrimit të miliardave përmes ndërtimit nuk ka ndodhur.
Nesër në sytë e gjithkujt, kur të shfaqet imazhi i atij Kryepolicit, shtojini në tavolinën e punës edhe djathin, sallamin, mishin e derrit. Ai kaq vlen.
/boldnews
