Pse disa njerëz me koronavirus nuk kanë simptoma dhe të tjerët sëmuren jashtëzakonisht shumë është një nga enigmat më të mëdha të pandemisë.
Një studim i “Nature” në më shumë se 2,200 pacientë në kujdes intensiv ka identifikuar gjenet specifike që mund të mbajnë përgjigjen.
Ato i bëjnë disa njerëz më të ndjeshëm ndaj simptomave të rënda të Covid-19. Zbulimet hedhin dritë se çfarë ndodh me sistemin imunitar, i cili mund të ndihmojë në identifikimin e trajtimeve të reja.
Këto do të vazhdojnë të jenë të nevojshme edhe pse vaksinat janë duke u zhvilluar. Vaksinat duhet të zvogëlojnë në mënyrë drastike numrin e rasteve me koronavirus, por ka shumë mundësi që mjekët do të vazhdojnë të trajtojnë sëmundjen në kujdesin intensiv për disa vite në të gjithë botën, kështu që ekziston një nevojë urgjente për të gjetur trajtime të reja”, ka thënë Kenneth Baillie, një këshilltar mjekësor në “Royal Infirmary” në Edinburg, i cili drejtoi projektin “Genomicc”.
Qelizat “e zemëruara”
Shkencëtarët kanë parë ADN-në e pacientëve në më shumë se 200 pacientë të kujdesit intensiv në spitalet e Mbretërisë së Bashkuar .Ata skanuan gjenet e secilit pacient, të cilat përmbajnë udhëzime për çdo proces biologjik, përfshirë mënyrën sesi e luftojnë një virus. Genomet e tyre u krahasuan më pas me ADN-në e njerëzve të shëndetshëm për të identifikuar çdo ndryshim gjenetik dhe u gjet një numër i tyre, i pari në një gjen të quajtur TYK2. Është një pjesë e sistemit që i bën qelizat tuaja imune më të zemëruara dhe më inflamatore”, shpjegon Baillie. Por nëse gjeni është i gabuar, kjo përgjigje imune mund të kalojë në mbingarkesë, duke rrezikuar pacientët dhe duke u shkaktuar inflamacion në mushkëri, informon,dritare.net.
Shumë pak interferon
Dallimet gjenetike u gjetën gjithashtu në një gjen të quajtur “DPP9”, i cili luan një rol në inflamacion, dhe në një gjen të quajtur “OAS”, i cili nuk e lejon virusin të shumëfishohet. Variacionet në një gjen të quajtur “IFNAR2” u identifikuan gjithashtu në pacientët e kujdesit intensiv. Ky i fundit lidhet me një molekulë të fuqishme anti-virale të quajtur “interferon”, e cila ndihmon në nisjen e sistemit imunitar sapo të zbulohet një infeksion.Mendohet se prodhimi i pakët i interferonit mund t’i japë virusit avantazh, duke e lejuar atë të përsëritet shpejt, duke çuar në sëmundje më të rëndë. Dy studime të tjera të fundit të botuara në revistën “Science” kanë implikuar gjithashtu interferonin në rastet e Covid-19, përmes mutacioneve gjenetike dhe një çrregullimi autoimun që ndikon në prodhimin e tij. Interferoni mund të jepet si një trajtim, por një provë klinike e Organizatës Botërore të Shëndetit arriti në përfundimin se nuk i ndihmoi pacientët të cilët janë shumë të sëmurë. Sidoqoftë, sipas Casanova-s koha është e rëndësishme. Ai shton-: “Shpresoj që nëse jepet në tri ose katër ditët e para të infeksionit, interferoni do të funksionojë, sepse në thelb do të siguronte molekulën që pacienti nuk e prodhon vetë”.
Kur gjërat shkojnë keq!
Vanessa Sancho-Shimizu, një gjenetiste nga “Imperial College London”, ka thënë se zbulimet gjenetike po siguronin një pasqyrë të fortë të biologjisë së sëmundjes. “Në të vërtetë është një shembull i mjekësisë precize, ku ne mund të identifikojmë momentin në të cilin gjërat kanë shkuar keq në atë individ. Gjetjet nga këto studime gjenetike do të na ndihmojnë të identifikojmë rrugë të veçanta molekulare që mund të jenë shënjestra për ndërhyrje terapeutike,” ka thënë ajo. Por gjenomi ende mban disa mistere. Studimi i “Genomicc”, dhe disa të tjerë, kanë zbuluar një tufë gjenesh në kromozomin 3 të lidhur fort me simptomat e rënda. Sidoqoftë, biologjia që mbështet këtë nuk është kuptuar ende. Tani do të kërkohet që më shumë pacientë të marrin pjesë në këtë hulumtim.
burimi: dritare.net
