Kryeministri portugez Antonio Costa ka deklaruar se do të japë dorëheqjen, pasi gjatë ditës së martë shefi i tij i shtabit u arrestua për korrupsion.
Costa, për të cilin prokurorët thanë se ishte objektivi i një hetimi të veçantë, njoftoi vendimin në një deklaratë televizive pas takimit me Presidentin Marcelo Rebelo de Sousa të martën.
Në një dalje publike ai tha se beson në sistemin e drejtësisë dhe se këta të fundit janë të lirë për të hetuar.
“Unë besoj plotësisht në sistemin e drejtësisë. Nëse ka dyshime, atëherë autoritetet gjyqësore janë të lira t’i shqyrtojnë ato … Unë nuk jam mbi ligjin”, tha ai.
Presidenti de Sousa pritet të pranojë dorëheqjen e tij, ndërsa opozita ka kërkuar që qeveria të largohet me efekt të menjëhershëm.
Disa orë përpara njoftimit, policia portugeze arrestoi Vitor Escaria, shefin e shtabit të Costa, gjatë bastisjeve në disa ndërtesa publike dhe prona shtesë si pjesë e hetimit për korrupsion.
Prokurorët emëruan Ministrin e Infrastrukturës Joao Galamba si të dyshuar zyrtar dhe arrestuan shefin e shtabit të Kostës. Kreu i agjencisë mjedisore të vendit u emërua gjithashtu si i dyshuar.
Zyra e prokurorit të shtetit ka thënë se Gjykata e Lartë e vendit po shikon “përdorimin e emrit të kryeministrit dhe përfshirjen e tij për të zhbllokuar” aktivitetet që po hetohen.
Në kohën kur kryeministri portugez jep dorëheqje për arrestimin e shefit të shbatit, Edi Rama me ish-zv.kryeministrin Arben Ahmetaj në kërkim për korrupsion dhe disa ish-kryebashkiakë socialistë të arrestuar për të njëjtën arsye, ai kërkon mandatin e katërt.
