“Britania duhet të dërgojë më shumë trupa në Kosovë për të parandaluar luftën në Ballkanin Perëndimor.” Kështu ka deklaruar kryeministri i Kosovës Albin Kurti në një intervistë për të përditshmen britanike “The Telegraph”.
“Ka vetëm një prani “simbolike” të NATO-s në vend dhe nuk do të mjaftonte për të parandaluar një pushtim nga Serbia. NATO duhet të angazhohet më shumë në Kosovë si ushtarakisht ashtu edhe politikisht. Britania duhet të dërgojë më shumë trupa në Kosovë për të parandaluar luftën në Ballkanin Perëndimor”, tha kryeministri i Kosovës.
Sipas Kurtit 48 baza serbe janë pozicionuar pranë kufirit për të sulmuar Kosovën.
“Besoj se për aq kohë sa Serbia nuk e njeh Kosovën, përderisa Serbia mban 48 baza operative rreth shtetit tonë dhe për aq kohë sa Serbia është aleate e ngushtë e Kremlinit, duhet të ketë më shumë kapacitete nga ana jonë e më tepër trupa të NATO-s”, shtoi Kurti.
Kryeministri i Kosovës tha se Beogradi duhet të ndryshojë qasje për të treguar se është i interesuar për normalizimin e marrëdhënieve.
“Por uroj që Serbia të ndryshojë qëndrimin dhe qasjen e saj ndaj Kosovës për normalizimin e marrëdhënieve. Unë besoj në drejtësi pa hakmarrje. Unë nuk besoj në hakmarrje. Nëse ka hakmarrje nuk mund të ketë drejtësi.”, tha ai.
Ndërkohë një zëdhënësi i ministrisë së Mbrojtjes së Britanisë së Madhe, duke iu përgjigjur komenteve të kryeministrit Kurti theksoi se Mbretëria e Bashkuar vazhdon të ofrojë mbështetje aktive për sovranitetin dhe pavarësinë e Kosovës dhe luan një rol kyç në ruajtjen e stabilitetit në Ballkan.
