Xhuljano Visha, 28 vjeç, i dënuar më parë për vjedhje rezulton se është ndërmjetuesi në vrasjen e Behar Sofisë. Ai është personi që telefonoi Enejt Shytin për ta pajtuar si ekzekutor në këmbim të 50 mijë eurove në vrasjen e Behar Sofisë.
Por kush është Xhuljano Visha?
Xhuljano Visha është një emër i njohur për Policinë, pasi është dënuar me hërët edhe për veprën penale të vjedhjes. Ai është edhe kushëriri i parë i Nazime Vishës, vajza që ekzekutoi më 3 mars të vitit 1994, Fiqiri Muçën, i cili ishte abuzuesi i saj.
E reja e vrau me breshëri kallashnikovi babain e 4 fëmijëve, 4 vite pasi ishte në lidhje intime me të. Ai kishte që prej moshës 14-vjeçare që abuzonte me të. Nazime Visha u dënua me 10 vjet burg. Ajo kreu 4 vite dhe më pas u fal nga amnistia e presidentit të Republikës.
Por si u zbulua grupi?
Pas ekzekutimit më 25 shkurt 2021 të biznesmenit të përfshirë në trafikun e drogës, Behar Sofia, grupi hetimor rindërtoi skemën e krimit. Në afërsi të Kodrave të Liqenit, policia gjeti rrobat e autorit të dyshuar të vrasjes që përkonin me identikitin e autorit që kreu vrasjen e Behar Sofisë. Më pas u identifikua dhe u bë gjurmimi i tij dhe rezultoi se ai është Enejt Shyti. Shyti ka pranuar autorësinë e krimit dhe ka zbuluar se ka marrë porosi për vrasjen nga Skënder Vathi kundrejt një shume prej 50 mijë euro.
