Operacioni ‘Forca e Ligjit’ ka zbritur sot në Vlorë.
OFL u ka dërguar formularët për deklarimin e pasurive 3 shtetasve për prodhim, shitje, trafikim narkotikësh dhe vrasje.
Bëhet fjalë për shtetasit; Real Osmani, banues në Vlorë, i dënuar për veprën penale “Vrasja me paramendim”, e mbetur në tentativë; dhe vëllezërit Elidon dhe Aleksandër Bojko, i pari i dënuar oër veprat penale “Prodhimi dhe shitja e narkotikëve” dhe “Grupi i strukturuar kriminal” dhe tjetri për “Prodhimi dhe shitja e narkotikëve”.
NJOFTIMI I PLOTË I OFL:
Në zbatim të detyrave të përcaktuara në Aktin Normativ të datës 31 janar 2020, vijon pa ndërprerë Operacioni Forca e Ligjit.
Në kuadër të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL i ka nisur kërkesat me shkrim për vetëdeklarimin e burimeve të pasurisë, shtetasve:
R. O., banues në Vlorë, i dënuar për veprën penale “Vrasja me paramendim”, e mbetur në tentativë;
E. B., banues në Vlorë, i dënuar për veprat penale “Prodhimi dhe shitja e narkotikëve” dhe “Grupi i strukturuar kriminal”;
A. B., banues në Vlorë, i dënuar për veprën penale “Prodhimi dhe shitja e narkotikëve”;
Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së dhe më pas, përgjigjet e marra do t’i dërgohen SPAK-ut, për veprime të mëtejshme.
/Gazetaatdheu.com/