Lojtarët do të detyrohen të vaksinohen për të luajtur në kupën e Botës 2022. Katari organizatori i eventit madhështor të sportit, është gati për të vendosur vaksinimin e detyrueshëm për lojtarët.
Autoritetet mjekësore të Katarit janë në bisedime intensive me FIFA-n për të vendosur në lidhje me këtë çështje, që për momentin është vetëm një propozim, por që shumë shpejt mund të marrë udhën e zyrtarizimit.
Aktualisht qeveria e Katarit ka vendosur detyrimin e vaksinimit për të gjithë tifozët që do të duan të ndjekin ndeshjet e Botërorit nga shkallët e stadiumit, ndërsa tani po punojnë që një gjë e tillë të bëhet edhe për komplet delegacionet e përfaqësueseve që do të sigurojnë një biletë pjesëmarrjeje.
Një opsion tjetër që po merret në konsideratë për futbollistët që janë shprehur kundër injektimit të vaksinës, është edhe ai i detyrimit për të paraqitur një test negativ çdo tri ditë, në mënyrë që të garantojë vazhdimisht se nuk është prekur nga koronavirusi.
Vetë FIFA, në një deklaratë për mediat ka bërë me dije se vendi organizator, Katari ka marrë përsipër të garantojë shëndetin e të gjithë pjesëmarrësve në Kupën e Botës dhe pikërisht për këtë arsye, është vendosur të ndiqen me përpikëri të gjithë udhëzimet e autoriteteve shëndetësore atje, të cilat pritet të publikohen në ditët e ardhshme.
