Romelu Lukaku është tashmë futbollisti më i shtrenjtë i të gjitha kohërave për vlerën e akumuluar të transferimeve, pasi Chelsea vendosi t’i paguajë Interit 115 milionë euro për ta rikthyer në “Stamford Bridge”.
28-vjeçari u largua nga “Stamford Bridge” në vitin 2014, pas 3 viteve të pasuksesshme me londinezët, ku ai nuk arriti të shënonte asnjë gol.
Megjithatë, sulmuesi belg rikthehet me një tjetër staturë në Premier Ligë, ku ai ka shënuar 177 gola në të gjitha kompeticionet pas largimit nga blutë e Londrës, 30 prej të cilëve me Interin sezonin e shkuar.
Vlera e fundit e transferimit e dërgon në total shifrën që klubet kanë paguar për Lukakun në 343 milionë euro, duke parakaluar Neymarin (318 milionë euro).
Transferimi i parë i Lukakut ishte nga Anderlehti te Chelsea për 20 milionë euro kur ishte 18 vjeç, gati 10 vite nga dita që rikthehet në Londër. Pastaj ai u transferua tek Evertoni për 33 milionë euro pas sezonit të suksesshëm i huazuar në “Goodison Park”, ku shënoi 15 gola në 31 ndeshje në Premier Ligë.
Lukaku u rible nga Jose Mourinho në vitin 2017, kur portugezi drejtonte këtë herë Manchester United për 88 milionë euro. Por në sezonin e dytë në “Old Trafford”, ku statistikat e tij arritën nivelin më të ulët në 4 sezonet e fundit, ai u transferua në Itali për 86 milionë euro.
Shifra që bashkë me bonuset mbërrijnë deri në 343 milionë euro në total.
Futbollisti i dytë më i shtrenjtë i historisë tashmë është Neymar, i cili është transferuar vetëm dy herë në karrierën e tij: transferimi nga Santosi te Barcelona në 2013 për 85 milionë euro, të cilat i shtohen edhe 222 milionë eurove të klauzolës që i pagoi PSG për ta transferuar nga “Camp Nou”.
Në vend të tretë renditet Cristiano Ronaldo (226 milionë euro) dhe pesëshen e parë e plotësojnë Eden Hazard (206 milionë euro) dhe Alvaro Morata (195 milionë euro).
