Me një opozitë të ndarë në dysh, pa kryetar, në luftë për vulën dhe selinë, Lulzim Basha është personi më i pashqetësuar për momentin në politikën shqiptare. Ai ka ende firmën e kryetarit të PD por postin e tij e ka deleguar fillimisht te Alibeaj e tani te Gaz Bardhi ose Jorida Tabaku.
Pasi Sali Berisha i mori me dhunë zyrën, Basha nuk doli më publikisht dhe mediatikisht. Madje dhe në Parlament ai shkonte me ditë, sa për të mos u përjashtuar e sa për të marrë rrogën. Një moskokëçarje politike e cila padyshim bëri që në fund të përforconte pushtetin e Ramës dhe fuqizimin politik të Berishës dhe Metës.
Së fundmi kryedemokrati është zgjuar dhe ka nisur fushatën e tij elektorale. Takimin e parë ua ka rezervuar të rinjve, duke u folur atyre për të ardhmen, për Shqipërinë dhe për politikanët e vjetër që kanë kapur çdo pushtet. Lulzim Basha po jep leksione a thua se nuk ka qenë ndonjëherë pjesë e politikës apo e pushtetit.
Ai ka falenderuar të rinjtë që bojkotuan zgjedhjet, u premtoi atyre një alternativë të re politike, hetim pasurie dhe figure për politikanët e vjetër si dhe tha se reflektimi që ka pasur me veten këto kohë i ka bërë mirë të shohi më qartë shqetësimet e shqiptarëve.
Teori dhe leksione politike që nuk të çojnë askund dhe asnjë seriozitet për të kuptuar se do të ketë përpjekje për të rrëzuar pushtetin e Ramës. Më shumë Basha duket se i gëzohet faktit se Rama do t’i dyfishojë pagën si deputet, sesa trishtohet që vendi ka mbi 10 vite pa një alternativë politike dhe një opozitë të vërtetë.
