Një biznes në afërsi të Golemit, Lushnje, ka rënë pre e një grabitje gjatës natës.
Sipas informacioneve paraprake, hajdutët kanë hyrë në objektin e thertores dhe kanë vjedhur kasafortën, si dhe kanë marrë një nga furgonat e kompanisë për të transportuar të mirat e vjedhura.
Pas realizimit të vjedhjes, hajdutët janë munduar të largohen me furgonin e vjedhur, por gjatë largimit kanë dalë nga rruga dhe kanë rënë në një kanal kullues në dalje të fshatit Golem i Vogël, drejt autostradës.
Pavarësisht aksidentit, autorët janë larguar nga vendi i ngjarjes me një mjet tjetër dhe kanë vazhduar rrugën në drejtim të autostradës Lushnje-Rrogozhinë.
Policia ka mbërritur në vendngjarje dhe ka realizuar ekspertizën, duke dokumentuar prova të mundshme që mund të çojnë në identifikimin dhe kapjen e autorëve. Gjithashtu, janë duke u analizuar pamjet filmike të kamerave të sigurisë nga bizneset e afërta për të zbardhur më tej dinamikën e ngjarjes dhe për të zbuluar mjetin që autorët përdorën gjatë vjedhjes.
Hetimet janë duke vazhduar, ndërsa policia është angazhuar për të kapur autorët dhe për të sqaruar plotësisht ngjarjen.
