Fotografi të reja të ish-presidentit venezuelian Nicolás Maduro, të realizuara gjatë qëndrimit të tij në izolim në Shtetet e Bashkuara, janë publikuar në llogarinë e tij zyrtare në rrjetin social X. Në pamjet, të datuara më 25 qershor 2026, Maduro shfaqet i veshur me uniformë burgu, duke buzëqeshur dhe me një pamje të qetë. Fotot janë prezantuar si një “dhuratë e vogël dashurie dhe shprese” për familjarët dhe mbështetësit e tij.
Në mesazhin shoqërues, Maduro u drejtohet nipërve, mbesave, fëmijëve dhe mbështetësve, duke i falënderuar për solidaritetin dhe mbështetjen e treguar. “Dua që ta dini se ne jemi të palëkundur, me zemrat tona plot me dashurinë tuaj”, thuhet në mesazh. Ai e mbyll dedikimin me një mesazh për bashkëshorten e tij, Cilia Flores, dhe një referencë fetare: “Zoti do të sigurojë. Venezuela do të rilindë.”
Maduro ndodhet i burgosur në SHBA pas arrestimit gjatë një operacioni në Karakas dhe përballet me akuza të rënda penale, përfshirë narkoterrorizëm, komplot për importimin e kokainës dhe posedim të armëve të luftës. Publikimi i fotografive vjen në një moment kur ish-presidenti venezuelian vijon të jetë në qendër të zhvillimeve të rëndësishme politike dhe ligjore mes Venezuelës dhe Shteteve të Bashkuara.
