Të burgosurit shqiptarë në Angli do të vuajnë dënimin në atdhe. Kështu ka deklaruar Ministria e Drejtësisë, e cila përmes një njoftimi ka bërë me në vazhdim të m0arrëveshjes mes Shqipërisë dhe Anglisë për emigrantët shqiptarë, do të bëhet riatdhesimi i 200 prej tyre.
Mësohet se riatdhesimi i tyre do të bëhet në një afat prej 2 vitesh. Shqiptarët të cilët janë dënuar 4 ose më shumë vite andej, do të vuajnë dënimin që u ka mbetur në Shqipëri.
Njoftimi i Ministrisë së Drejtësisë
Në vijim të komunikatës së përbashkët të nënshkruar nga Kryeministri shqiptar Edi Rama dhe Kryeministri britanik Rishi Sunak në dhjetor 2022, si dhe pas diskutimeve që dy liderët zhvilluan në Londër në mars 2023, Shqipëria do të fillojë implementimin e marrëveshjes për transferimin e të burgosurve. Kështu, 200 të burgosur shqiptarë në burgjet e Anglisë dhe Uells që vuajnë dënime prej katër vjetësh ose më shumë do të kthehen në dy vitet e ardhshme për të kryer pjesën e mbetur të dënimit në burgjet shqiptare.
Falë marrëveshjes, pala britanike do të paguajë kostot e strehimit të të burgosurve për gjatë gjithë kohëzgjatjes së dënimit të tyre në vendin tonë dhe Shqipëria do të mund të rrisë investimet për përmirësimin e mëtejshëm të kushteve në sistemin e burgjeve. Ndërkohë që u japim mundësinë të dënuarve shqiptarë në Britaninë e Madhe, të shlyejnë pjesën e mbetur të dënimit pranë familjeve të tyre, Shqipëria do të mund të fuqizojë edhe më tej kapacitetet e sistemit penitenciar.
