Policia e Tiranës ka arrestuar një 37- vjeçar pasi akuzohet për mashtrim. Shtetasi E.B. është arrestuar ndërsa bashkëpunëtori i tij është shpallur në kërkim. Ata kanë përvetësuar, nëpërmjet mashtrimit, shumën prej 25 mijë euro, nga një shtetase.
Ata i kanë thënë shtetases se do t’i blinin asaj një apartament.
Njoftimi i policise:
Finalizohet operacioni policor i koduar “Fraud”, nga Seksionin për Hetimin e Krimit Ekonomik dhe Financiar, në DVP Tiranë.Vihet në pranga një shtetas që përvetësoi nëpërmjet mashtrimit shumën 25 000 euro.
Shpallet në kërkim bashkëpunëtori i tij.Specialistët e Seksionit të Kërkimit, në bashkëpunim me Seksionin për Hetimin e Krimit Ekonomik dhe Financiar, në vijim të punës për goditjen e veprimtarisë kriminale në fushën ekonomiko-financiare dhe vënien e autorëve përpara përgjegjësisë penale, kanë organizuar dhe finalizuar operacionin policor të koduar “Fraud”.Si rezultat i këtij operacioni, u bë arrestimi i shtetasit E. B., 37 vjeç, banues në Tiranë.
Gjithashtu, u shpall në kërkim shtetasi D. R., 35 vjeç.Shtetasi E. B., dhe D. R., duke qenë të punësuar si administratorë në një subjekt, kanë përvetësuar, nëpërmjet mashtrimit, shumën prej 25 mijë euro, nga një shtetase, me pretendimin se do t’i blinin asaj një apartament.Materialet i kaluan Prokurorisë, për veprime të mëtejshme.
