Maturantët nuk ndalen. Edhe nesër, ashtu si tre ditët e fundit, ata do të grumbullohen sërish para Ministrisë së Arsimit për protestën e rradhës.
Testi i Gjuhës dhe Letërsisë shqipe i maturës shtetërore ka ngjallur diskutime të mëdha. Mënyra aspak tradicionale e hartimit të testit dhe formulimit të pyetjeve sollën një valë reagimesh nga maturantët, të cilët kanë nisur protestat para Ministrisë së Arsimit.
Ata kërkojnë rishikimin e testit duke u shprehur të pakënaqur për nivelin e provimeve, ndaj edhe janë mbledhur para këtij institucioni, në pritje të një reagimi nga kjo e fundit.
Gjithashtu, ata kanë kërkuar rivlerësim të testit dhe uljen e kufirit për notën 9 dhe 10.
Nga ana tjetër, Ministria e Arsimit është e vendosur që provimi të mos përsëritet, ndërsa sot ministrja Besa Shahini tentoi edhe ta politizojë protestën.
Kujtojmë se nesër është programuar provimi i Matematikës.
