Një nigerian shumë i famshëm në Instagram, falë postimeve të tij, ku ai tregonte avionët e tij privatë dhe makinat luksoze që zotëronte, është arrestuar nga FBI.
Kjo, pikërisht falë provave të grumbulluara nga postimet në rrjetin social.
Në qershor, Ramon Olorunwa Abbas, që nga ndjekësit e tij njihej si “Ray Hushpuppi”, u arrestua në Dubai.
Ai dyshohet se është pjesë e një mashtrimi kibernetik prej rreth 400 milionë dollarë.
Në Instagram ai prezantohej si një agjent imobiliar, por federalët mendojnë se, pasuria e tij ka ardhur si pasojë e një skeme hakerimi.
Prej kësaj skeme ai ka vjedhur miliona dollarë nga kompani të mëdha amerikane dhe evropiane.
Muajin e kaluar, policia e Emirateve të Bashkuara Arabe e arrestoi dhe ia dorëzoi FBI-së, që e dërguan në Çikago në datën 2 korrik.
Nigeriani u arrestua bashkë me 11 persona të tjerë, ndërsa policia njoftoi se ka sekuestruar 41 milionë dollarë dhe 13 makina luksoze me vlerë 6,8 milionë dollarë.
Gjithashtu, atyre u zbuluan 2 milionë adresa email të viktimave të mundshme nëpër celularë dhe kompjutera.
Postimet e tij ekstravagante lanë gjurmë digjitale që hetuesit i përdorën për të lidhur nigerianin me krimet kibernetike.
FBI përdori të dhënat e tij në profilin e tij në Instagram për t’i lidhur me transaksione në shuma të mëdha me njerëz që FBI mendon se janë bashkëpunëtorët e tij.
