Ushtria amerikane ka shpërndarë në mediet sociale një fotografi, ku sipas tyre është fotografuar ushtari i fundit amerikan që u largua nga Kabuli mbrëmë, duke shënuar fundin e luftës 20-vjeçare në Afganistan.
Gjenerali, Chris Donahue, është fotografuar duke hipur në avionin e fundit, që u nis mbrëmjen e së hënës nga kryeqyteti afgan, Aeroporti Ndërkombëtar Hamid Karzai.
“Ushtari i fundit amerikan është larguar nga Afganistani”, shkruan USCENTCOM përmes Twitter-it.
Tërheqja përfundimtare e ushtrisë amerikane nga Afganistani përfundoi dje, 24 orë përpara afatit që ishte vendosur. Fluturimi i fundit u nis nga Kabuli pak para mesnatës, ndërkohë që tashmë i gjithë vendi është në kontrollin e talebanëve.
Këta të fundit e kanë ”festuar” këtë moment me të shtëna armësh, ndërkohë që mijëra afganë, bashkëpunëtorë të SHBA-ve u evakuuan më herët nga vendi.
Në një deklaratë të shpërndarë në media, talebanët shprehen se ata do të mbajnë marrëdhënie pune me perëndimin.
