Qendrës “Orenda” në Pejë i është hequr licenca pas skandalit të publikimit të videos ku dhunohej e moshuara Nure nga njëra prej infermiereve të kësaj qendre.
Rasti mori përhapje të gjerë pasi videoja u bë virale në rrjet. Dhuna që 23-vjeçarja Aurona Pelaj ushtronte ndaj të moshuarës mori reagime të shumta nga qytetarët të cilët dënuan publikisht veprimet e saj.
Në qytetet e Kosovës sot në shtylla shiheshin të ngjitura poste të printuara me foton e Pelajt ku shkruhej: DHUNUESJA KA EMËR!
NJOFTIMI
Revokohet licenca e subjekit “Orenda”. Pas publikimit të pamjeve të sulmit fizik ndaj të moshuarës në subjektin “Orenda” në Pejë, Njësia e Inspektimit të Shërbimeve Sociale ka bërë inspektimin e menjëherëshëm të vendit të ngjarjes, si dhe intervistimin e stafit të qendrës dhe dëshmitarëve të rastit.
Me përmbylljen e raportit të inspektimit, i njëjti i është dorëzuar sot Komisionit Licencues, i cili ka mbajtur një takim urgjent ku është marrë vendim që subjektit “Orenda” t’i revokohet licenca për ofrimin e shërbimeve sociale.
Sipas vendimit të Komisionit, subjekti në fjalë është i obliguar që brenda një afati 24 orësh t’i njoftojë familjarët e rezidentëve lidhur me vendimin, kurse deri më datë 7 nëntor (e hënë) obligohet të dorëzojë licencën dhe të mbyll aktivitetin e ofrimit të shërbimeve sociale.