Mediat kanë zbardhur së fundmi bisedat e brendshme dhe private mes deputetëve të Partisë Socialiste, të cilat zbulojnë prapaskenat se si maxhoranca i kërkoi Policisë së Shtetit të ndërhyjë ndaj protestuesve. Sipas raportimeve të mediave, këto diskutime tensioni mes socialistëve çuan direkt në ndërhyrjen e forcave të rendit dhe shoqërimin e 6 protestuesve. Ky veprim ka shkaktuar mjaft habi në opinionin publik, duke qenë se për 30 ditë me radhë qeveria e kishte mbajtur qëllimisht policinë larg konfrontimeve me qytetarët në shesh.
“Manovrat” e Ballës për t’u Shpëtuar Vezëve
Siç bëjnë me dije mediat, i pari që ka hapur diskutimin ka qenë kreu i grupit parlamentar socialist, Taulant Balla. Ai ka marrë rolin e një “komandanti toge” për të orientuar kolegët e tij se si të shmangnin goditjet me vezë nga protestuesit përpara se të futeshin në seancë.
“Vëmendje. Nga krahu i Toptanit ka protestues me vezë. Hajdeni nga krahu i Xhamisë,” u ka shkruar Balla deputetëve në grupin e tyre të komunikimit, duke sugjeruar rrugë dytësore për t’u futur në godinë.
Ndonëse në hyrje socialistët arritën t’u shpëtonin protestuesve, situata ka ndryshuar radikalisht gjatë mesditës. Në dalje, automjetet e disa prej deputetëve janë qëlluar masivisht me vezë, gjë që ka shkaktuar panik dhe revolte brenda radhëve të maxhorancës.
Shpërthen Erjon Braçe: Po lejohet degjenerimi i deputetëve!
Sipas mesazheve të publikuara në media, ai që ka shpërthyer i pari në ankesa ndaj policisë ka qenë deputeti Erjon Braçe, makina e të cilit u shënjestrua disa herë.
“Kjo që policia lejon degjenerimin e deputetëve në sy të kamerave është e papranueshme. Dhe janë gjithsej veç 100 copë. Dhe praktikisht është sulm fizik,” ka shkruar Braçe i indinjuar.
Në debat e sipër, Drejtorja e Komunikimit e kryeministrit Rama, Jonida Shehu, u ka bërë thirrje deputetëve që thjesht të bëjnë kujdes dhe të shmangin me çdo kusht kontaktin me protestuesit.
Në bisedë është përfshirë për një çast edhe Blendi Gonxhja, por mediat raportojnë se ai është penduar shpejt dhe e ka fshirë menjëherë mesazhin. Gazetarët ironizojnë se Gonxhja shpesh shkruan gjëra jashtë kontekstit në këto grupe – si për shembull ankesat e tij të mëparshme se nuk po shiteshin biletat e koncertit të Kanye West – ndaj mbetet mister nëse edhe këtë herë ka ngritur të njëjtin shqetësim përpara se ta fshinte tekstin.
Akuzat për “Gjueti” dhe Frika e Deputetëve
Diskutimi ka vijuar sërish me tone të ashpra nga Erjon Braçe, i cili i ka cilësuar sulmet me vezë si një skenar të mirëmenduar.
“Shikoni, unë mendoj që kjo është e qëllimshme dhe kjo është gjueti e qartë ndaj çdo deputeti, pa pyetur është burrë apo grua. Nëse policia e shtetit ka këtë qëllim shumë mirë; bravo i qoftë të gjithëve, por s’ja kemi kujt borxh,” ka vijuar ai.
Nga ana tjetër, edhe deputeti socialist i Lezhës, Admir Kadeli, ka shprehur hapur shqetësimin për sigurinë e tij, duke sulmuar administratën e Kuvendit që nuk i lejonte makinat të futeshin brenda rrethimit të institucionit.
“Minimumi pse nuk i futni makinat e deputetëve brenda, bur i lini të dalin në këmbë? Cënohet siguria e Parlamentit nga makinat e deputetëve?!” ka shkruar Kadeli.
Urdhri Ekzekutohet: Policia Ndërhyn Pas 20 Minutash
Ajo që ngre pikëpyetje të mëdha mbi pavarësinë e forcave të rendit është koha e reagimit. Fiks 20 minuta pas këtyre ankesave dhe debateve në grupin e socialistëve, Policia e Shtetit ka ndërhyrë me dhunë në shesh, duke shoqëruar forcërisht 6 protestues, të cilët u mbajtën për disa orë në komisariatet e Tiranës.
Sipas analizës që mediat po i bëjnë këtij rasti, ky episod jo vetëm që zbulon se policia u vu në lëvizje nga presionet dhe frika e deputetëve, por tregon një realitet më të madh: maxhoranca tashmë është e trembur nga reagimi qytetar dhe ka filluar të shohë komplote dhe “gjueti” në çdo vezë që fluturon drejt tyre.
