Meksika ka siguruar kualifikimin për në fazën e 1/8-ave të Botërorit 2026, pasi triumfoi me rezultatin 2-0 ndaj Ekuadorit në sfidën e vlefshme për 1/16-at. Skuadra e “El Tri” i dha fund pritjes së gjatë për një fitore në fazën me eliminim direkt të Kupës së Botës, duke arritur suksesin e parë të tillë që prej vitit 1986.
Edhe pse ndeshja nisi me një orë vonesë për shkak të kushteve atmosferike, atmosfera në “Estadio Azteca” ishte spektakolare, me mijëra tifozë vendas që shtynë ekipin drejt një paraqitjeje bindëse. Meksikanët morën menjëherë kontrollin e lojës dhe krijuan disa raste të rrezikshme me Raúl Jiménez dhe Gilberto Mora, përpara se të gjenin golin e avantazhit.
Në minutën e 22-të, Julián Quiñones realizoi një supergol pas një aksioni individual nga krahu i majtë, duke mposhtur Hernán Galíndez me një goditje të fuqishme në shtyllën e parë. Sulmuesi regjistroi kështu golin e tretë personal në këtë edicion të Botërorit.
Pak minuta më vonë erdhi edhe goli i qetësisë. Raúl Jiménez rikuperoi topin në gjysmën kundërshtare, bashkëpunoi në mënyrë perfekte me Quiñones dhe e mbylli aksionin me një finalizim të saktë për rezultatin 2-0.
Në pjesën e dytë, Ekuadori provoi të rikthehej në lojë përmes ndryshimeve në formacion, por nuk arriti të krijonte rrezik real për portën meksikane. Nga ana tjetër, Meksika vazhdoi të kontrollonte ritmin e sfidës dhe iu afrua edhe golit të tretë, me César Montes që rrezikoi me një goditje me kokë.
Situata për ekuadorianët u rëndua edhe më shumë në minutat e fundit, kur Piero Hincapié u ndëshkua me karton të kuq pas një përplasjeje me një kundërshtar.
Me këtë fitore, Meksika regjistron ndeshjen e katërt radhazi pa pësuar gol në Botërorin 2026 dhe vazhdon me besim rrugëtimin drejt fazave më të avancuara të turneut.
