Presidenti i Republikës, Ilir Meta, ka kujtuar sot rikthimin e Familjes Mbretërore shqiptare në Atdhe, 18 vite më parë.
Meta postoi një video të rrallë të 18 viteve më parë, kur familja Mbretërore zbriti pas 6 dekadash ekzil në Atdhe.
Presidenti tha se, rikthimi i tyre, edhe pse me vonesë, ishte një akt pajtimi dhe rivlerësimi.
Sipas Metës, ai vlerësoi kontributin e pamohueshem të Mbretit të shqiptarëve, Ahmet Zogut, për krijimin dhe funksionimin e shtetit shqiptar modern.
STATUSI I PLOTË:
“Rikthimi i Familjes Mbretërore shqiptare në Atdhe 18 vite më parë, pas mbi 6 dekada mërgimi të detyruar është një ngjarje historike për të gjithë shqiptarët.
Edhe pse me vonesë ishte një akt pajtimi dhe rivlerësimi për kontributin e pamohueshem të Mbretit të shqiptarëve, Ahmet Zogut për krijimin dhe funksionimin e shtetit shqiptar modern.
Aq më tepër kur këtë vit festuam 100-vjetorin e Kongresit të Lushnjes ku roli i Tij ka qenë madhor, jo vetëm per realizimin e tij por edhe zbatimin e vendimeve të këtij Kongresi.
Në këtë ditë të shënuar një mirënjohje e veçantë i takon Mbretëreshës Geraldinë e cila në një moshë shumë të re vendosi të bëhej shqiptare dhe i qëndroi besnike përgjithmonë Atdheut që zgjodhi edhe kur ai i ktheu shpinën”./Gazetaatdheu.com/