Çmimi i qumështit dhe nënprodukteve të tij ka pësuar një rritje të shpejtë në muajin e fundit. përpunuesit e qumështit arsyetojnë me mungesën e qumështit në Treg. Ata kanë deklaruar për mediat, se me largimin e fuqisë punëtore po reduktohet prodhimi bujqësor, por edhe ai blegtoral.
Ata shprehen se fermerët e vegjël kanë hequr bagëtitë për shkak të rritjes së madhe të kostove, dhe kjo ka çuar efektin zinxhir në mungesën e qumështit, e për pasojë rritjen e çmimit të nënprodukteve të tij.
Sipas tyre, skemat e subvencionit nuk janë të mjaftueshme, shtojmë dhe faktin që nuk janë të barabarta për të gjithë fermerët.
Ndërsa këta të fundit shprehen se për shkak të shpenzimeve që nuk i përballojnë dot janë detyruar të reduktojnë numrin e bagëtive dhe të rrisin çmimin e produkteve.
Syrja Tomorri, i cili prej 23 vitesh ka përpunuar qumësht në baxhon e tij në Velmish të Roskovecit tregon se më parë arrinte të mblidhte sasinë e nevojshme të qumështit tek fermerët e vegjël, ndërsa tani ata kanë falimentuar.
“Gjithçka po shkatërrohet, bujqësia, blegtoria dhe biznesi. Vetë unë disa vite më parë e mblidhja tek fermerët e fshatrave përreth e më gjerë një sasi tepër të madhe qumështi. Ndërsa sot arrij të mbledh vetë 4 tonë në ditë në fermat e vogla dhe në stane”, tha ai.
Ai ka treguar për mediat se ata që dikush ishin fermerët të vegjël dhe krijonin të ardhura me bagëtitë, sot janë zhytur në varfëri.