Anne Burrell, emër i dashur për publikun amerikan dhe ikonë e ekranit përmes Food Network, u nda nga jeta të martën në moshën 55-vjeçare në shtëpinë e saj në Brooklyn, duke lënë pas një trashëgimi të pasur në botën e kulinarisë.
Burrell, e njohur për stilin e saj të veçantë me flokë platinë të ngritura dhe energjinë e papërmbajtshme, vdiq më 17 qershor. Lajmi u konfirmua nga përfaqësuesit e saj në një deklaratë zyrtare. Ajo ishte një ndër figurat më të njohura në emisionin “Worst Cooks in America”, ku shndërronte kuzhinierët më të dëshpëruar në garues të denjë.
Në deklaratën prekëse të familjes, Anne përshkruhet si një bashkëshorte, nënë, motër dhe mike e dashur. “Buzëqeshja e saj ndriçonte çdo dhomë, ndërsa dashuria dhe ngrohtësia e saj do të jetojnë përgjithmonë,” u tha mes të tjerash. Ajo lë pas bashkëshortin Stuart Claxton, djalin e tij Javier, nënën Marlene, motrën Jane dhe vëllezërit Ben dhe fëmijët e saj: Isabella, Amelia dhe Nicolas.
Lindur më 21 shtator 1969 në Cazenovia të New York-ut, Burrell e zbuloi dashurinë për gatimin që herët, e frymëzuar nga pjatat e nënës dhe figura televizive si Julia Child. Studimet e saj në fushën e komunikimit në Canisius College ia hapën rrugën më pas një karriere të bujshme në kulinari, të cilën e nisi në Culinary Institute of America, ku u diplomua në vitin 1996.
Pas një specializimi të mëtejshëm në Institutin Italian për të Huaj në Piemonte, ajo kreu stazhe intensive dhe u dashurua me filozofinë e kuzhinës italiane. Në kthim në Nju Jork, punoi në restorante të njohura si Felidia me Lidia Bastianich dhe Savoy në SoHo, ku zhvilloi më tej stilin e saj mesdhetar.
Në fillim të viteve 2000, Burrell nisi një kapitull të ri si instruktore në Institute of Culinary Education. Më pas, ajo debutoi në televizion si sous-chef në “Iron Chef America”, çka shënoi fillimin e një karriere televizive të suksesshme që kulmoi me emisionin e saj “Secrets of a Restaurant Chef”, i cili u nominua për çmim Emmy dhe vazhdoi për nëntë sezone.
Përveç “Worst Cooks in America”, ajo mori pjesë në programe të tjerë të Food Network si “Chef Wanted”, “Chopped”, “Food Network Star” dhe më së fundi në “House of Knives”, që nisi transmetimin në mars 2025. Çdo paraqitje e saj e ngarkonte ekranin me energji, entuziazëm dhe mjeshtëri kuzhinare.
Anne ishte gjithashtu një autore e suksesshme me dy libra gatimi: “Cook Like a Rock Star” (2011), që u bë bestseller i New York Times, dhe “Own Your Kitchen”, i cili synonte të frymëzonte lexuesit me receta praktike dhe vetëbesim në kuzhinë.
Jeta e saj nuk kufizohej vetëm në ekran apo kuzhinë. Ajo ishte aktive në filantropi, pjesë e bordit këshillimor të Garden of Dreams Foundation, ambasadore për Juvenile Diabetes Research Foundation dhe anëtare e angazhuar në Këshillin Ushqimor të City Harvest.
Në prill 2023, Burrell mori pjesë në Galanë e 40-vjetorit të City Harvest së bashku me bashkëshortin e saj Stuart Claxton, me të cilin u njoh përmes aplikacionit Bumble në vitin 2018 dhe u martua më 16 tetor 2021. “E dua të qenit e martuar,” u shpreh ajo atëherë, “bashkëshorti im punon nga shtëpia dhe jemi gjithmonë bashkë. Kjo është edhe e bukura – të jemi bashkë në çdo aventurë.”
Largimi i Anne Burrell shënon një humbje të madhe për komunitetin e kuzhinës dhe televizionit. Ajo la një trashëgimi të pasur që do të frymëzojë breza të rinj kuzhinierësh dhe do të kujtohet si një grua që solli gëzim, pasion dhe dritë kudo ku shkeli.
