Herët çdo mëngjes në një qytet në lindjen e largët të Indonezisë, adoleshentët e përgjumur mund të shihen duke ecur nëpër rrugë për në shkollë. Ata po marrin pjesë në një eksperiment të diskutueshëm për ta nisur ditën shumë më herët.
Projekti pilot në Kupang, kryeqyteti i provincës Lindore Nusa Tenggara, ka nxënës të klasës së dymbëdhjetë në 10 shkolla të mesme që fillojnë mësimet në orën 5:30 të mëngjesit. Autoritetet thonë se skema, e shpallur muajin e kaluar nga guvernatori Viktor Laiskodat, synon të forcojë disiplinën e fëmijëve.
Por me këtë projekt nuk bien dakord prindërit, të cilët thonë se fëmijët janë të rraskapitur kur kthehen në shtëpi. Shkollat në Indonezi zakonisht fillojnë nga ora 7-8 e mëngjesit.
“Është jashtëzakonisht e vështirë, ata tani duhet të largohen nga shtëpia ndërsa është ende errësirë. Nuk mund ta pranoj këtë. Siguria e tyre nuk garantohet kur është errësirë dhe qetësi”, tha për AFP Rambu Ata, një nënë e një 16-vjeçareje.
Shkolla zakonisht përfundon rreth orës 15:30 në Indonezi. “Kjo nuk ka asnjë lidhje me përpjekjet për të përmirësuar cilësinë e arsimit”, tha Marsel Robot, një ekspert i arsimit nga Universiteti Nusa Cendana.
Sipas tij, mungesa e gjumit mund të rrezikojë shëndetin e studentëve dhe të shkaktojë një ndryshim në sjellje. “Ata do të flenë vetëm disa orë dhe ky është një rrezik serioz për shëndetin e tyre. Kjo gjithashtu do t’u shkaktojë atyre stres dhe ata do ta shfryjnë stresin e tyre duke vepruar”, tha ai.
