Ndërkohë që vëmendja publike është përqendruar te zhvillimet politike dhe protestat në vend, Bashkia e Vlorës ka mbyllur një nga tenderat më të dyshimtë të periudhës së fundit, duke shpallur fitues një nga operatorët me çmimin më të lartë në garë.
Sipas dokumenteve të publikuara më 20 tetor 2026, tenderi i zhvilluar nga autoriteti kontraktor i është dhënë bashkimit të operatorëve “VALONA KONSTRUKSION” sh.p.k. dhe “VIBTIS” sh.p.k., me një vlerë prej 267,545,000 lekë pa TVSH ose rreth 3.5 milionë euro me TVSH.
Oferta më e shtrenjtë shpallet fituese
Shqyrtimi i formularëve zyrtarë zbulon se në këtë garë janë skualifikuar dhe anashkaluar kompani që kishin paraqitur oferta dukshëm më ekonomike për buxhetin publik:
-
53.5 milionë lekë më shtrenjtë: Oferta fituese kapërceu një konsorcium tjetër pjesëmarrës që kishte ofertuar 214 milionë lekë pa TVSH.
-
Oferta të tjera më të lira: Në garë u skualifikuan gjithashtu propozime me vlerë 228 milionë dhe 242 milionë lekë pa TVSH, duke i kushtuar buxhetit të bashkisë miliona lekë më shumë.
Profil i biznesmenit Besnik Lulaj
Kompania kryesore e konsorciumit fitues, “VALONA KONSTRUKSION” (ish-“MARINA BAY LUXURY RESORT AND SPA”), zotërohet 100% nga biznesmeni Besnik Lulaj.
Lulaj, i njohur si pronar i resortit luksoz “Marina Bay” në Vlorë, ka qenë shpesh në qendër të raportimeve mediatike për aksionet e tij në biznes, si dhe për përmendjen në media lidhur me investime e ortakëri në fushën e lojërave të fatit me emra si Luftar Hysa.
Fakti që tenderi publik me vlerë miliona euro i jepet kompanisë së Lulajt duke skualifikuar ofertat më të lira ngre pikëpyetje serioze mbi korrektësinë e procedurave dhe barazinë në garë nga ana e Bashkisë së Vlorës.
