Ka disa gjeste të vogla që tregojnë më shumë se një mijë fjalë, dhe një prej tyre vjen nga zemra e një nëne shqiptare. Dy turistë të huaj një rumun dhe një holandeze, që po udhëtonin me biçikleta në një prej zonave të Shqipërisë, takuan rastësisht një nënë, e cila sapo kishte mbledhur një kovë plot me manaferra. Pa i njohur dhe pa i parë kurrë më parë, ajo ua zgjati frutat me një buzëqeshje të ngrohtë, sikur përpara saj të kishte dy djem që i kishte rritur vetë.
Por zemra e një nëne shqiptare nuk njeh kursim kur bëhet fjalë për të dhënë dashuri. “Mbusheni, mbusheni më shumë!”, u thoshte ajo me këmbëngulje, duke u siguruar që të rinjtë të merrnin sa më shumë nga frutat e mbledhura me duart e saj. Të mahnitur nga kjo bujari e papritur, turistët kuptuan se kishin marrë shumë më tepër se disa manaferra, kishin përjetuar atë mikpritje të rrallë që lind natyrshëm nga zemra dhe që nuk njeh gjuhë, kombësi apo kufij. “Jam shqiptare!”, u tha nëna, sikur në ato dy fjalë të përmblidhej gjithçka që ajo përfaqësonte.
Dhe vërtet, kështu janë shumë nëna shqiptare, me duar të lodhura nga puna, por me zemër gjithmonë të mbushur për të tjerët. Ato nuk pyesin nga vjen, çfarë gjuhe flet apo nëse të kanë parë ndonjëherë, mjafton të jesh i ri që të të shohin si fëmijën e tyre, të të ushqejnë, të të gostitin e të mos të lënë të ikësh duarbosh. Ndoshta këta dy turistë do ta harrojnë një ditë rrugën ku u takuan, por vështirë se do ta harrojnë nënën shqiptare që u dhuroi manaferra me gjithë shpirt. Sepse Shqipëria nuk është vetëm male, lumenj e peizazhe të bukura, Shqipëria është edhe kjo zemër e madhe, kjo dorë e shtrirë dhe kjo dashuri që i bën edhe të huajt të ndihen si fëmijë në shtëpinë e nënës së tyre.
<iframe width=”460″ height=”818″ src=”https://www.youtube.com/embed/yG1tqpq87Xw” title=”Nëna shqiptare me zemër gjithmonë të mbushur për të tjerët” frameborder=”0″ allow=”accelerometer; autoplay; clipboard-write; encrypted-media; gyroscope; picture-in-picture; web-share” referrerpolicy=”strict-origin-when-cross-origin” allowfullscreen></iframe>
