Pas ngjarjes së rëndë në një nga hotelet luksoze në Qerret, ku mbetën të vdekur katër turistë rusë, për hetimet janë angazhuar edhe dy ekspertë të NATO-s, të cilët pritet të hedhin dritë mbi vdekjen e mistershme. Hetimeve të ushtrisë shqiptare dhe asaj ruse, i janë bashkangjitur dhe partnerë të tjerë të huaj, teksa pajisjet e përdorura për të kryer eksperimentin ishin siguruar nga aleanca e Atlantikut të Veriut. Dyshimet kryesore të grupit hetimor janë se mbi turistët rusë mund të jenë përdorur agjentë kimikë ose biologjikë, ndërsa pistat e tjera të asfiksimit janë rrëzuar pas kryerjes së ekspertimeve të ujit apo dhe masës së dyoksidit të karbonit të lëshuar nga pajimet e hotelit. Kujtojmë se pak javë më parë, në një hotel luksoz në Qerret të Kavajës, hotel ’Gloria’ u regjistrua një ngjarje tragjike dhe misterioze. Në rrethana ende të paqarta, në këtë hotel u gjetën të pajetë 4 turistë rusë. Viktimat Sergei Burenkov, 60 vjeç, Natalia Burenkova, 58 vjeçe, Ekatetina Burenkova 31 vjeçe dhe Nikita Belousov, 37 vjeç u konstatuan pa shenja jete në ambientin e hotelit, në datë 15 tetor 2021 rreth orës 22:00.
