Prokurorët e Nju Jorkut i kanë dhënë avokatëve të ish-presidentit Donald Trump 24 orë për t’u përgjigjur me një argument të fundit se pse nuk duhet të ngrihen akuza penale kundër biznesit të tij familjar.
Afati i caktuar për të hënën ishte një tjetër sinjal i fortë se avokati i rrethit Manhattan, Cyrus Vance dhe prokurorja e përgjithshme e Nju Jorkut, Letitia James, po shqyrtojnë akuzat penale kundër kompanisë së ish-presidentit si njësi, sipas burimeve të cituara nga Washington Post.
Sipas Guardian, të Premten, u raportua se Vance mund të shpallte akuza kundër Organizatës Trump dhe zyrtarit kryesor të saj financiar, Allen Weisselberg, brenda shtatë ditësh. Çdo akuzë penale do të ishte e para në hetimin e Vance për Trump dhe marrëdhëniet e tij të biznesit.
Ekspertët ligjorë kanë thënë se një padi kundër Organizatës Trump mund të falimentojë kompaninë duke minuar marrëdhëniet e saj me bankat dhe partnerët e tjerë të biznesit.
Zyra e Vance ka thënë se po hetonte “sjellje të mundshme të gjera dhe të zgjatura kriminale” në Organizatën Trump, duke përfshirë mashtrimin e taksave dhe sigurimeve dhe falsifikimin e regjistrave të biznesit.
Edhe nëse nuk ngrihen akuza, hetimi i Vance mund të komplikojë çdo kthim në politikë nga Trump, i cili ka humbur disa nga aftësitë e tij për të komunikuar publikisht pasi u ndalua përgjithmonë nga Twitter dhe u pezullua për dy vjet nga Facebook.
Zyra e James ka qenë duke hetuar nëse Organizata Trump ka fryrë vlerat e disa pronave për të marrë kushte më të mira për huatë dhe ka ulur vlerat e tyre për të marrë zbritje të taksës së pasurisë.
