Një kompani e madhe farmaceutike në Suedi ka nisur një nismë të pazakontë për të luftuar vetminë mes punonjësve. Apotek Hjärtat, që ka më shumë se 400 farmaci dhe rreth 3,400 punonjës, po teston programin “Vänvård”, përmes të cilit stafi mund të përdorë 15 minuta në javë ose një orë në muaj, me pagesë, për të telefonuar një mik, për të pirë një kafe apo për të organizuar një takim.
Kompania ofron rreth 90 euro për aktivitete sociale, me synim krijimin ose forcimin e marrëdhënieve shoqërore. Nisma vjen pas një studimi që tregon se një në pesë suedezë përjeton vetmi, ndërsa të rinjtë 18-24 vjeç janë ndër grupet më të prekura, duke raportuar më shumë vetmi, ankth dhe pakënaqësi me jetën.
Përveç kohës dhe mbështetjes financiare, punonjësit do të marrin këshilla për parandalimin e vetmisë, ndërsa drejtuesit do të trajnohen për të dalluar shenjat e izolimit social te kolegët. Sipas kompanisë, edhe 15 minuta në javë mund të bëjnë ndryshim, duke e kthyer miqësinë dhe kontaktet shoqërore në një pjesë të rëndësishme të mirëqenies në vendin e punës.
