Të shkosh në SHBA tashmë, ose të marrësh nënshtetësinë e këtij vendi, apo edhe të kërkosh azil, të gjithëve do t’u kushtojë një shumë të konsiderueshme parash.
Administrata Presidentit Donald Trump, njoftoi të premten se, do të rrisë në mënyrë drastike tarifat për shërbimet e imigracionit në shumë kategori.
Këtu përfshihen edhe vendosja për herë të parë të një tarife për aplikimet për azil dhe një rritje prej 80% për procesin e marrjes së shtetësisë.
Struktura e re e tarifave, e njoftuar nga Zyra amerikane e Imigracionit (USCIS), pritet të hyjë në fuqi më 2 tetor.
Kostoja e aplikacioneve për marrjen e shtetësisë në internet, do të rritet nga 640 në 1160 dollarë. Do të ketë gjithashtu një tarifë prej 50 dollarësh për azilkërkuesit.
Agjencia, e cila ka mbyllur zyrat dhe ka pezulluar shumicën e shërbimeve gjatë pandemisë, ka thënë se, po përballet me një mungesë të konsiderueshme të të ardhurave që mund të shkaktojnë pushime të përkohshme të personelit nga puna. Në fillim të këtij viti, Zyra e Imigracionit kërkoi nga Kongresi 1.2 miliard dollarë fonde urgjente.
“USCIS është e detyruar të shqyrtojë shpenzimet hyrëse dhe dalëse dhe të bëjë ndryshime bazuar në atë analizë”,- tha Joseph Edlow, zëvendësdrejtori për politika i Zyrës amerikane të Imigracionit (USCIS), në një deklaratë për shtyp.
Ai shtoi, “Këto ndryshime të vonuara të tarifave janë të domosdoshme për të administruar në mënyrë efikase dhe të drejtë sistemin e ligjshëm të imigracionit, për të siguruar vendin dhe për të mbrojtur amerikanët.”
Sipas Zyrës së Imigracionit, rregulli i ri mbështet pagat, teknologjinë dhe operacionet për të përmbushur misionin e saj.
Ekspertët thanë se Shtetet e Bashkuara tani i bashkohen Iranit, Fixhit dhe Australisë në vendosjen e një tarife për azilkërkuesit.
Aaron Reichlin-Melnick, këshilltar politik në Këshillin Amerikan të Imigracionit, një organizatë jofitimprurëse në Uashington që mbështet imigrantët, kritikoi barrën e shtuar financiare për të sapoardhurit, të cilët gjithashtu duhet të paguajnë një tarifë për lejen fillestare të punës.
Më parë, agjencia hoqi dorë nga propozimi për vendosjen e një tarife rinovimi prej 275 dollarësh për përfituesit e programit DACA.
Tarifat e Zyrës së Imigracionit në Shtetet e Bashkuara janë rritur në mënyrë dramatike gjatë dekadave të fundit. Në vitet 1990, tarifa për të aplikuar për shtetësi ishte nën 100 dollarë.
Zyra e Imigracionit nuk operon si shumica e agjencive të tjera federale pasi ajo merr fonde kryesisht nga mbledhja e tarifave.
/Burimi: VOA/ Gazetaatdheu.com/
