Një në katër të punësuar në Shqipëri rezulton të marrë një pagë deri në 50 mijë lekë në muaj. Të dhënat për tremujorin e dytë të vitit 2026 tregojnë ndryshime në strukturën e pagave, pas rritjes së pagës minimale nga 40 mijë në 50 mijë lekë në fillim të këtij viti.
Në fund të vitit 2025, rreth 33.8% e të punësuarve merrnin deri në 50 mijë lekë, ndërsa 12.8% e tyre paguheshin deri në 40 mijë lekë. Gjashtë muaj më vonë, pesha e kësaj kategorie është ulur me rreth 8 pikë përqindje, ndërsa ndryshimi lidhet edhe me rritjen e kufirit të pagës minimale.
Në të njëjtën kohë, është rritur pesha e punonjësve me paga më të larta. Në tremujorin e dytë të vitit 2026, 48.3% e të punësuarve merrnin mbi 75 mijë lekë në muaj, nga 43% në fund të vitit 2025. Ndërsa 32.1% kishin paga mbi 95 mijë lekë, kundrejt 29.4% në tremujorin e katërt të vitit të kaluar.
