Shqipëria vijon të përballet me sfida të mëdha në punësimin e të rinjve, teksa 20,1% e grupmoshës 15–29 vjeç rezultojnë jashtë arsimit, punës dhe formimit profesional (NEET) në vitin 2025, sipas të dhënave të INSTAT. Brenda kësaj kategorie, 38,5% janë të papunë aktivë dhe në kërkim të një vendi pune, 1,6% klasifikohen si të dekurajuar, ndërsa 19,5% janë të angazhuar në kujdesin familjar. Ndërkohë, 40,4% renditen në kategorinë “të tjera”, duke reflektuar pasiguri ose informalitet në statusin e tyre ekonomik.
Treguesit dëshmojnë se meshkujt janë më aktivë në tregun e punës sesa femrat, pasi 46,5% e meshkujve NEET kërkojnë punë, krahasuar me 31,9% të femrave. Shqipëria mbetet ndër vendet me nivelin më të lartë të të rinjve NEET në rajon dhe gati dyfish mbi mesataren e Bashkimit Evropian, duke u renditur pas Kosovës, e cila regjistron rreth 30%. Edhe papunësia e të rinjve mbetet shqetësuese, me normën 21,5% për grupmoshën 15–24 vjeç, krahasuar me 8,4% për popullsinë në tërësi.
Ndërsa të rinjtë përballen me vështirësi për t’u integruar në tregun e punës, numri i të punësuarve mbi 65 vjeç ka vijuar të rritet. Sipas INSTAT, të punësuarit në këtë grupmoshë u shtuan nga 119,862 në vitin 2024 në 130,274 në vitin 2025. Pjesa më e madhe e tyre janë të vetëpunësuar në bujqësi dhe konsiderohen të punësuar sipas metodologjisë statistikore, edhe kur aktiviteti i tyre kufizohet në prodhimin për vetëkonsum.
