Pasi sfidoi drejtësinë e SPAK-ut me videon ku pretendohej se pinte kokainë, Lefter Alla sfidon sërish rregullat e qeverisë.
Kryebashkiaku socialist i Bulqizës po shkel me të dyja këmbët një nga urdhërat e Komitetit të Ekspertëve për mos grumbullimin e personave në ambiente të mbyllura.
Pjesë e këtij urdhëri janë edhe mosorganizimi i dasmave dhe protestave. Kanë qenë të shumta bizneset që janë gjobitur për mbajtjen e eventit festiv.
Po ashtu janë shoqëruar në komisariate të gjithë organizatorët e protestave gjatë kohës së pandemisë.
Kjo nuk e ka ndaluar aspak Lefter Allën të ekzaltohet për ngjitjen në Kategorinë e Dytë të ekipit F.K Bulqiza.
Kryebashkiaku për këtë ka organizuar edhe një festë në ambientet e kinemasë së qytetit.
Një foto e publikuar nga JOQ Albania, tregon se Alla ka nisur shpërndarjen e ftesave në Bulqizë dhe ende nuk dihet sa do të jetë numri zyrtar i të ftuarve. E sigurtë është fakti se kryebashkiaku do të dëfrehet në një ambient të mbyllur.
Por a është në djeni Lefter Alla se qeveria që e ka caktuar në krye të Bulqizës ka ndaluar grumbullimet masive?! Sigurisht që po.
Por kjo nuk do të thotë që Alla së bashku me pushtetin vendor në duart e tij të ndalojë organizimin e festës, e cila është planifikuar ditën e mërkurë.