Më në fund një lajm i mirë! Covid-19 nuk është më një emergjencë globale shëndetësore. Kjo është pohuar sot nga Organizata Botërore e Shëndetësisë.
Komiteti i Urgjencës i Rregulloreve Ndërkombëtare të Shëndetit të OBSH-së diskutoi pandeminë në takimin e tij të 15-të mbi Covid-19 dhe Drejtori i Përgjithshëm i OBSH-së, Tedros Adhanom Ghebreyesus u pajtua që urgjenca e shëndetit publik me shqetësim ndërkombëtar, ose deklarata PHEIC, duhet të përfundojë.
“Për më shumë se një vit, pandemia ka qenë në rënie. Kjo prirje ka lejuar që shumica e vendeve të kthehen në normalitet siç e dinim përpara Covid-19. Dje, komiteti i urgjencës u mblodh për herë të 15-të dhe më rekomandoi që të shpallja fundin e urgjencës së shëndetit publik me shqetësim ndërkombëtar. Unë e kam pranuar atë këshillë”, tha Tedros në një konferencë shtypi.
Organizata e shpalli shpërthimin e koronavirusit si një emergjencë të shëndetit publik me shqetësim ndërkombëtar në janar 2020, rreth gjashtë javë përpara se ta karakterizonte atë si një pandemi.
Covid-19 vazhdon të përhapet, virusi po evoluon dhe mbetet një kërcënim global për shëndetin, por në një nivel më të ulët shqetësimi, sipas zyrtarëve të OBSH-së./ CNN
