Asambleja e Përgjithshme e OKB-së ka mbështetur përdorimin e një harte të re të botës, e cila paraqet në mënyrë më reale përmasat e kontinenteve, veçanërisht Afrikën.
Rezoluta për promovimin e projeksionit “Equal Earth” mori mbështetjen e 164 shteteve, ndërsa SHBA votoi kundër dhe gjashtë vende abstenuan. Harta synon të zëvendësojë gradualisht projeksionin tradicional Mercator në materiale edukative, media dhe platforma të ndryshme.
Harta Mercator, e krijuar në shekullin XVI kryesisht për lundrim, shtrembëron përmasat e territoreve, veçanërisht ato pranë poleve. Për shembull, në shumë harta tradicionale Groenlanda duket pothuajse sa Afrika, ndërkohë që në realitet Afrika është rreth 14 herë më e madhe.
Vendimi i OKB-së nuk e ndalon përdorimin e hartës Mercator, por nxit përdorimin e hartave që pasqyrojnë më saktë sipërfaqen reale të vendeve dhe kontinenteve.
