Operacioni Forca e Ligjit u ka kërkuar burimet e pasurisë 3 trafikantëve të dënuar për trafikim narkotikësh në Lushnjw e Kavajë.
OFL-ja u nisi formularët të dënuarve Aranit Arapi, Shkëlzen Ahmetaj, Muhamet Demrozi, të cilët duhet të japin llogari për pasurinë brenda 48 orëve.
Njoftimi i OFL:
“Në zbatim të detyrave të përcaktuara në Aktin Normativ të datës 31 janar 2020, vijon pa ndërprerë Operacioni Forca e Ligjit.
Në kuadër të zbatimit të Ligjit Special, për masat pasurore ndaj individëve të dënuar apo akuzuar për krim të organizuar, apo krime të rënda, OFL i ka nisur kërkesat me shkrim për vetë-deklarimin e burimeve të pasurisë, shtetasve:
A. A., banues në Lushnjë, i dënuar për veprën penale “Trafikimi i narkotikëve”, kryer në bashkëpunim;
Sh. A., banues në Kavajë, i dënuar për veprën penale “Trafikimi i narkotikëve”, kryer në bashkëpunim, mbetur në tentativë;
M. D., banues në Kavajë, i dënuar për veprën penale “Trafikimi i narkotikëve”, kryer në bashkëpunim”;
Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së dhe më pas, përgjigjet e marra do t’i dërgohen SPAK-ut, për veprime të mëtejshme.
OFL është në veprim të pandërprerë dhe në kryerje të veprimeve komplekse për vendosjen e sekuestrove emergjente mbi pasuritë e dyshuara të përfituara nga krimi, si dhe për dërgimin e formularëve të vetëdeklarimit të gjithë personave që janë subjekt i Ligjit Special.
OFL do të informojë publikun në vijimësi për të gjitha nismat procedurale dhe operacionet ekzekutive që do të kryejë”.
/Gazetaatdheu.com/
