Qindra konsumatorë po padisin prodhuesit e barnave të njohura për dobësim të peshës, përfshirë Ozempic, Wegovy, Mounjaro dhe Zepbound, duke pretenduar se medikamentet mund të lidhen me një formë të rrallë të humbjes së shikimit të njohur si NAION. Gjendja, e përshkruar si një lloj “goditjeje në sy”, shkaktohet nga ulja e papritur e qarkullimit të gjakut në nervin optik dhe mund të sjellë dëmtim të përhershëm të shikimit.
Studimet e publikuara deri tani kanë dhënë sinjale për një lidhje të mundshme, veçanërisht me semaglutidin, përbërësi aktiv i Ozempic dhe Wegovy. Një analizë e publikuar në JAMA Ophthalmology në vitin 2025 gjeti një rritje modeste të rrezikut të NAION te përdoruesit e semaglutidit, ndërsa një studim i Harvard Medical School në vitin 2024 raportoi një rrezik relativ rreth katër herë më të lartë te pacientët me diabet tip 2. Megjithatë, të dyja studimet ishin vëzhguese dhe nuk mund të provonin se ilaçi ishte shkaku i drejtpërdrejtë. Kompanitë Novo Nordisk dhe Eli Lilly i kanë kundërshtuar akuzat, ndërsa FDA po shqyrton të dhënat për një lidhje të mundshme.
NAION zakonisht shkakton humbje të papritur dhe pa dhimbje të shikimit në njërin sy, shpesh në mëngjes, dhe nuk ka aktualisht një trajtim të provuar që rikthen dëmtimin e nervit optik. Faktorë si diabeti, tensioni i lartë, kolesteroli i lartë, apnea e gjumit dhe duhanpirja mund të rrisin rrezikun, duke e bërë të vështirë përcaktimin e rolit të vetë medikamenteve. Ekspertët theksojnë se pacientët nuk duhet t’i ndërpresin këto barna pa u konsultuar me mjekun.
