Kopertina e revistës së përjavshme gjermane ‘Die Aktuelle’, e cila pretendon të ketë intervistën e parë ekskluzive me Michael Schumacher, ka shkaktuar bujë në Gjermani, por edhe jashtë kufijve të saj.
Titulli dhe kopertina e revistës bëjnë të qartë se vetë Schumacher ka dhënë intervistën e tij të parë pas aksidentit tragjik të skijimit në vitin 2013, i cili e la në koma. E ndërsa askush nuk e di gjendjen e vërtetë të shëndetit të ish-pilotit, revista vazhdoi me një taktikë shumë të diskutueshme.
Në kopertinën e revistës ajo pretendon se ka marrë intervistën e parë të Schumacher-it, madje ka shkruar edhe fjalët e tij. Sigurisht që realiteti është ndryshe, pasi revista dyshohet se ka përdorur sistemin e inteligjencës artificiale (chatbot) që mund të përgjigjet duke imituar njerëz të famshëm.
Kjo lëvizje e revistës ka bërë bujë, sidomos në periudhën e fundit kur bashkëshortja e Schumacher ka deklaruar se po bën gjithçka për të mbajtur familjen të bashkuar dhe larg thashethemeve dhe deklaratave të rreme.
