Këshilli i Lartë Gjyqësor ka vendosur të pezullojë nga detyra gjyqtaren Enkelejda Kapedani deri në përfundim të hetimit disiplinor mbi çështjen e saj.
Seanca për vlerësimin e kërkesës të bërë nga ILD, ku kërkohej shkarkimi ose pezullimi nga detyra e magjistrates zgjati përreth 3-rë dhe nisi me një ndjesë publike nga ana e Kapedanit.
Gjyqtarja në mbrojtjen e saj përballë trupës së KLGj së deklaroi se videot që janë publikuar në “TikTok” nuk janë bërë në orarin e saj të punës, dhe diskretitimi i saj është bërë për shkak të çështjeve të nxehta që ka pasur në dorë.
Ajo theksoi se ka dhënë dorëheqjen nga posti i nënkryetares së Elbasanit, teksa i kërkoi KLGJ-së mos-shkarkimin e saj, pasi siç edhe ajo pretendon veshja dhe muzika nuk kanë ndikim në punën e saj.
Këto deklarimie hasën në kundërshtimin e kreut të ILD Artur Metani, i cili pohoi se ekzistojnë kushtet ligjore për pezullimin e Kapedanit nga detyra.
Metani: Në rastin konkret ekzistojnë kushtet ligjore për caktimin ndaj magjistrates Enkeleda Kapedani të masës provizore të pezullimit nga ushtrim i detyrës deri në përfundimin e procedimit disiplinor, për shkak se vazhdimi i magjistratit në detyrë diskrediton rëndë figurën dhe pozitën e magjistratit.
Kapedani: Po e nis mbrojtjen me një ndjesë të thellë publike. Kam pritur gjatë të dalë para jush. Kjo për shkak të një vendimi të dhënë nga unë që me ndjek e perndjek edhe sot. Jam gjyqtare e denjë.
Asnjë sekondë e jetës sime private nuk ka ndikuar te puna. E gjithë kjo që ka ndodhur është një tmerr për mua, pa menduar dy herë të gjithë vendosën që të më bëjnë gjyq publik. A keni ju një bilanc të punës sime si gjyqtare?
Më lejoni të pyes sërish se në cilin vend të botës një gjyqtar shkarkohet se po dëgjon muzikë, apo që i janë publikuar video private. Pse isha pikërisht unë e goditura, kë kam shkelur unë në kallo, kam të drejtë të pyes, pasi më lindin shumë pikëpyetje.
Është e qartë se kjo situatë ka qenë e qëllimshme, kryesisht për shkak të karrierës sime. Mos vallë isha duke konsumuar drogë? Isha duke komunikuar me avokatë apo prokurorë?
Unë e kuptoj presionin e madh që qëndron mbi ju, po ashtu dhe mbi mua, mos lejoni që ethet e klikimeve dhe bota e krimit të godasin mbi mua.
Unë kam paraqitur dorëheqjen nga posti i nënkryetares së Elbasanit, për të vijuar më tej punën si gjyqtare në këtë insitucion.
Hetimi disiplinor mbi gjyqtaren pritet të zgjas rreth 2 muaj e gjysmë deri në dhënien e një vendimi përfundimtar mbi të.
