Presidenti turk, Rexhep Tajip Erdogan u detyrua të anulojë daljet e tij publike për të tretën ditë për shkak të sëmundjes. Ai vendosi të mos marrë pjesë në inaugurimin e planifikuar të sotëm të një ure në Adana, në jug të Turqisë.
Megjithatë, ai do të marrë pjesë përmes videokonferencës nga zyra e tij. Vihet re se Erdogan rrallëherë nuk arrin të marrë pjesë në inaugurimet e infrastrukturës, përmes të cilave ai promovon fushatën e tij për t’u rizgjedhur në zgjedhjet presidenciale të 14 majit. Dhe dje, të mërkurën, ai gjithashtu nuk mori pjesë në hapjen e një linje hekurudhore të shpejtësisë së lartë në Ankara.
Erdogan bëri fushatë me një ritëm intensiv dhe zakonisht bënte tre dalje publike në ditë.
Por presidenti 69-vjeçar në largim u sëmur të martën mbrëma, dy javë para zgjedhjeve parlamentare dhe presidenciale. Ai u detyrua të ndërpresë një intervistë të drejtpërdrejtë televizive për shkak të një shqetësimi në stomak dhe më pas pezulloi daljet publike.
Dje, të enjten, ai u shfaq shkurtimisht në një video-konferencë me presidentin rus Vladimir Putin, në të cilën presidenti turk u shfaq i zbehtë. Ministri i Shëndetësisë Fahrettin Koca tha se Erdogan kishte probleme me stomakun dhe kishte nevojë për pushim.
Sondazhet e fundit paraqesin një betejë kokë më kokë midis Erdogan dhe rivalit të tij kryesor për presidencën, liderit të opozitës Kemal Kilicdaroglu.
