Pastor Akili përfundon tek Komisioneri Për Mbrojtjen nga Diskriminimi, rindizet polemika me komunitetin LGBTI+

Pastor Akili përfundon tek Komisioneri Për Mbrojtjen…

Një ankesë e “Aleanca LGBT” në institucionin e Komisionerit Kundër Diskriminimit, ka rikthyer polemikat mes komunitetit LGBTI+ dhe pastorit Akil Pano.

Akil Pano u shfaq para mediave ditën e djeshme (video më poshtë), pas seancës në këtë institucion dhe deklaroi se i janë mohuar të drejtat kushtetuese dhe tha se deklaratat e tij publike, janë nxjerrë nga konteksti.

E gjithë gjëja është e inskenuar. Janë shkëputur fjalë dhe nocione dhe u janë vendosur interpretime të reja. I kemi dërguar Komisionerit një material dhe kemi kërkuar që seanca të jetë publike“, tha ndër të tjera pastori.

Lidhur me këtë ka reaguar “Aleanca LGBT”, me një deklaratë ku shpjegohet përse pastori është referuar tek Komisioneri për Diskriminimin dhe rastet kur ka përdorur “gjuhë urrejtje dhe diskriminuese”.

Në dalje të ndryshme televizive si dhe në mediat sociale, Z. Akil Pano shpreh vazhdimisht jo vetëm paragjykime të padrejta e të pabazuara ndaj komunitetit LGBTI+, por nxit hapur diskriminimin dhe urrejtjen e publikut ndaj këtij komuniteti, duke i asociuar personat LGBTI+ me zoofilinë, duke i stigmatizuar ata si pjesë e një komuniteti të sëmurë, egoist dhe agresiv, duke i akuzuar që duan të shkojnë në shkolla dhe të shndërrojnë fëmijët në homoseksualë dhe duke keqinformuar publikun, se komuniteti LGBTI+ kërkon heqjen e termit nënë dhe baba nga fjalori, ndërkohë që ne e kemi sqaruar vazhdimisht që nuk e kemi kërkuar kurrë diçka të tillë”, thuhet ndër të tjera në deklaratë.

Pastor Akili është mjaft i njohur për publikun, pasi shfaqet në televizione dhe media të shkruara, sa herë hapen debate në lidhje me të drejtat e komunitetit LGBTI+ në Shqipëri, martesat mes personave të së njëjtës gjini dhe adoptimi i fëmijëve nga çfitet e së njëjtës gjini. Veç këtyre debateve, që duket se i ka përzemër, sepse është i pranishëm thuajse gjithmonë, pastori Akil del në TV edhe kur janë festat e Krishtlindjeve dhe Pashkëve.

Më poshtë reagimi i plotë i “Aleanca LGBT”, organizatë e drejtuar nga aktivistja Xheni Karaj: 

Zoti Akil Pano, pastor i Kishës “Ungjilli i Krishtit” ka nisur një fushatë keqinformimi të mbushur me gjuhë urrejtjeje ndaj komunitetit LGBTI+, duke përdorur median, rrjetet sociale dhe mbështetjen e ndjekësve të tij.

Në daljen publike të datës 02.09.2021, Z. Akil Pano na akuzoi se kishim ndërtuar një ankesë për diskriminim dhe gjuhë urrejtjeje ndaj tij mbi deklarata të nxjerra nga konteksti. Në fakt, ankesa jonë bazohet vetëm në fakte të njohura publikisht, lehtësisht të verifikueshme dhe në argumente të mbështetura në ligj.

Në deklaratën e djeshme për mediat, pastori Akil Pano flet edhe për kufizimin e lirisë së tij të shprehjes si qytetar i një shoqërie demokratike. Dëshirojmë t`i rikujtojmë pastorit dhe publikut të gjerë një parim të thjeshtë juridik: “Liria e shprehjes nuk gëzon asnjë mbrojtje ligjore nëse cënon, fyen, denigron dhe nxit moskuptim e urrejtje ndaj një apo disa individëve të tjerë”. Ky qëndrim reflektohet në ligjin shqiptar e ndërkombëtar, në Konventën Europiane për të Drejtat e Njeriut (instrument i ratifikuar nga shteti Shqiptar, me fuqi kushtetuese sa i përket nivelit të kufizimeve që vendos) dhe në jurisprudencën e Gjykatës Europiane për të Drejtat e Njeriut, e cila është shprehur, se përdorimi i gjuhës diskriminuese, më pak favorizuese dhe gjuhës së urrejtjes nga persona që janë pjesë e jetës publike nuk mund të konsiderohet si liri shprehjeje.

Të qenurit personazh publik, me apo pa dëshirë e vendos pastorin Akil Pano në një pozicion të ndryshëm nga ai i një individi të panjohur për publikun, për faktin e thjeshtë se ka të gjitha mundësitë të ndikojë opinionin dhe kuptimin e masës, duke e nxitur atë drejt mendimeve e sjelljeve paragjykuese, diskriminuese dhe të dhunshme ndaj komunitetit LGBTI+. Në faqen e vet në facebook, idhtarët e kishës së pastorit që duhet të ishte një institucion fetar ku promovohet dashuria për njeriun, në mënyrë të përsëritur fyejnë dhe bëjnë thirrje për urrejtje ndaj komunitetit LGBTI+, duke u larguar kështu nga fryma disa shekullore e feve në Shqipëri që nuk i fryjnë asnjë zjarri përjashtues. Komentet janë mes të tjerave edhe si komenti i Esmeres, një ndjekëse e pastorit, e cila në komentin e saj i quan pjesëtarët e komunitetit LGBTI+, djem e vajza shqiptarësh, ‘’kopila’’ që i kanë lënë nënat nëpër spitale. Ky dhe qindra komente të tjera në postimet individuale të Akilit janë pasojë direkte e gjuhës diskriminuese dhe frymëzimit që ngjall pastori i urrejtjes në publikun që e ndjek.

Ligji për mbrojtjen nga diskriminimi e përkufizon si diskriminim të hapur daljen publike të një personi, që me prononcimet dhe artikulimin e mbajtur ka të gjitha mundësitë të krijojë baza për mohimin e barazisë dhe krijimin e paragjykimeve të padrejta e të pabazuara të publikut të gjerë, ndaj një personi apo grupi personash.

Në dalje të ndryshme televizive si dhe në mediat sociale, Z. Akil Pano shpreh vazhdimisht jo vetëm paragjykime të padrejta e të pabazuara ndaj komunitetit LGBTI+, por nxit hapur diskriminimin dhe urrejtjen e publikut ndaj këtij komuniteti, duke i asociuar personat LGBTI+ me zoofilinë, duke i stigmatizuar ata si pjesë e një komuniteti të sëmurë, egoist dhe agresiv, duke i akuzuar që duan të shkojnë në shkolla dhe të shndërrojnë fëmijët në homoseksualë dhe duke keqinformuar publikun, se komuniteti LGBTI+ kërkon heqjen e termit nënë dhe baba nga fjalori, ndërkohë që ne e kemi sqaruar vazhdimisht që nuk e kemi kërkuar kurrë diçka të tillë.

Gjatë muajit korrik, një vajzë e komunitetit trasngjinor u dhunua fizikisht si pasojë e retorikës së urrejtjes ndaj komunitetit LGBTI+ të ngritur në media dhe rrjete sociale, në sajë të keqinformimit mediatik nga gazetarë, personazhe publike dhe nga vetë pastori Akil Pano. Debati ndalon së qenuri konstruktiv dhe edukues në momentin kur vihet në lojë mirëqënia, siguria dhe jeta e njerëzve.

Më Të Klikuarat

Lajmet e fundit