Parlamenti Europian e humbi durimin me Serbinë duke i thënë “boll e mohuat masakrën në Srebrenicë”.
Deklarata e tyre erdhi dy ditë pasi policia e Serbisë pengoi aktivistët e të drejtave të hidhnin bojë mbi një murale të madhe në qendër të Beogradit, ku shihet portreti i komandantit të dënuar serb boshnjak të kohës së luftës, Ratko Mlladiç.
Një gjykatë ndërkombëtare për krimet e luftës e ka dënuar Mlladiçin me burgim të përjetshëm për gjenocid në enklavën boshnjake të Srebrenicës në vitin 1995, kur rreth 8,000 burra dhe djem boshnjakë të cilët ishin kryesisht myslimanë, u vranë nga trupat e tij gjatë luftës në Bosnje.
Kjo kujtohet si masakra më e rëndë ne Europë që nga nga Lufta e Dytë Botërore. Zyrtarët serbë kanë mohuar vazhdimisht se është kryer gjenocid në Srebrenicë dhe autoritetet nacionaliste të vendit kanë toleruar portretizimin e kriminelëve të dënuar serbë të luftës, përfshirë Mlladiçin, si heronj dhe luftëtarë të lirisë.
“Mbrojtja policore e muralit është një tjetër shembull i asaj që qeveria e Serbisë dhe presidenti Aleksandar Vuçiç mendojnë në lidhje me pajtimin, sundimin e ligjit, demokracinë dhe bashkëpunimin rajonal”, thuhet në deklaratë. “Është krejtësisht e papranueshme që një vend kandidat për në BE të vendosë policinë e tij për të mbrojtur një mural të të dënuarve për krime lufte,” shtohet atyre.
“Ne u bëjmë thirrje autoriteteve serbe që të ndalojnë mohimin e gjenocidit të Srebrenicës dhe glorifikimin e kriminelëve të dënuar të luftës”, vazhdon deklarata. Vuçiç, një ish-ultranacionalist, i hodhi poshtë kritikat e BE-së, duke thënë se “ato fjalë nuk kanë brenda tyre asgjë tjetër veç urrejtjes për serbët”.
