Saimir Metani, 36 vjeçari që rrahu dhe përdhunoi gjyshen e tij në Divjakë, është arrestuar nga Policia në kushtet e flagrancës. Ai u shoqërua dje menjëherë pas ngjarjes, ndërsa sot njoftohet arrestimi i tij.
Djali i të moshuarës ka denoncuar 36 vjeçarin në Polici dhe është shprehur se Saimir Metani kishte kryer veprime të ngjashme edhe më parë, ndaj të afërmve, në Greqi. Ai tha se i arrestuari nuk është djali i tij, por djali i gruas nga një martesë tjetër.
Informacion i Policisë Divjakë:
Specialistët për Hetimin e Krimeve në Komisariatin e Policisë Divjakë, arrestuan në flagrancë shtetasin S. M., 36 vjeç, banues në Lushnjë, pasi dyshohet se në fshatin Grabian, Divjakë, në banesën e gjyshes së tij, shtetases H. K., 89 vjeçe, ka dhunuar dhe kryer marrëdhënie seksuale me dhunë me këtë shtetase.
Materialet i kaluan Prokurorisë pranë Gjykatës së Shkallës së Parë Lushnjë për veprat penale “Dhunë në familje” dhe “Marrëdhënie seksuale ose homoseksuale me persona të pazotë për tu mbrojtur”.
