Komunikime private, takime me drejtuesit më të lartë të shtetit dhe informacione që, sipas SPAK, i përcilleshin një personi nën hetim. Dosja hetimore ngre pikëpyetje serioze mbi mënyrën se si është menaxhuar informacioni nga drejtuesja e Shërbimit Informativ të Shtetit, Vlora Hyseni.
Sipas materialeve të siguruara nga dosja hetimore, Hyseni ka pranuar se ka komunikuar në mënyrë të vazhdueshme me Ergys Agasin deri në ditën e arrestimit të tij. Ajo ka deklaruar se Agasi i kishte ofruar “bashkëpunim”, ndërsa ka mohuar që të ketë dhënë informacione nga SHISH.
Por SPAK, në analizën e komunikimeve të sekuestruara, jep një tjetër këndvështrim dhe pretendon se Agasi nuk shfaqet thjesht në rolin e një “bashkëpunëtori”, por si person që merrte dhe orientonte informacionin.
Dhe pikërisht këtu nis pjesa më e debatueshme e dosjes.
“Zemër”, “shpirt” dhe qindra komunikime
Mesazhet e publikuara në dosje tregojnë një komunikim të shpeshtë mes Hysenit dhe Agasit.
Në një prej tyre, Vlora Hyseni i shkruan Ergys Agasit:
“Krejt këta njerëz që na kanë bërë çka na kanë bërë dua që të paguajnë.”
Në një tjetër:
“Zemër, thjesht duhet të koncentrohemi te halli ynë.”
Ndërsa në komunikime të tjera shfaqen:
“Të gjithë ne”
dhe
“Do përfundojmë keq, shpirt.”
Sipas SPAK, komunikimet nuk kufizohen vetëm te biseda personale.
Takimi me kryeministrin, direkt në telefon
Më 24 gusht 2026, sipas dosjes, Vlora Hyseni i shkruan Ergys Agasit:
“Nesër duhet ta takoj KM në 8:30”.
SPAK thotë se Hyseni i përcillte Agasit edhe informacione mbi takimet, itineraret dhe aktivitetin e saj zyrtar.
Në një tjetër komunikim, Hyseni i shkruan:
“Skënderi më thirri me u taku të hënën”.
Më pas:
“Të shpresojmë që ka porosit KM…”
Në dosje, “Skënderi” identifikohet si Skënder Hita, Drejtor i Përgjithshëm i Policisë.
Balla dhe Balluku në komunikime
Një tjetër pjesë e dosjes lidhet me informacionet për zyrtarë të tjerë të lartë.
Vlora Hyseni i shkruan Ergys Agasit:
“Taulant Balla kryetar Kuvendi…. Kështu janë infot… Bela me Taon shoku”.
Sipas dosjes, referencat lidhen me Taulant Ballën dhe Belinda Ballukun.
508 komunikime dhe një pyetje që rëndon mbi dosjen
Sipas SPAK, vetëm nga pajisja e Ergys Agasit janë administruar 508 forma komunikimi me Vlora Hysenin, duke përfshirë telefonata, video-thirrje dhe mesazhe.
Për më tepër, komunikimet kanë vijuar edhe gjatë periudhës kur Agasi ishte shpallur në kërkim.
Për një institucion si SHISH, ku informacioni është vetë thelbi i funksionimit, këto të dhëna kanë një peshë të veçantë. Dosja ngre pikëpyetjen se deri ku ka shkuar informacioni që një drejtues i shërbimit sekret mund t’i ketë përcjellë një personi nën hetim dhe nëse janë respektuar rregullat e sigurisë së informacionit.
Nuk është thjesht çështja e një komunikimi “mes dy njerëzve”. Është pyetja se çfarë informacioni ka dalë nga rrethi i një institucioni që ka për detyrë të mbrojë informacionin e ndjeshëm të shtetit.
SPAK e ka ngritur këtë si pjesë të hetimit. Përgjegjësia përfundimtare, nëse ka, do të përcaktohet nga organet gjyqësore.
