Sokol Bibaj, i njohur me nofkat “Gus”, “Gusti” dhe “Pitbull”, është një prej personave të shpallur në kërkim në kuadër të një hetimi të SPAK për një grup të dyshuar kriminal, i cili dyshohet se ishte i përfshirë në trafikun ndërkombëtar të kokainës nga Amerika Latine drejt vendeve të Europës.
Për Bibajn, Gjykata e Posaçme ka caktuar masën e sigurisë “arrest në burg”. Sipas akuzave të ngritura në kuadër të hetimit, ai dyshohet për trafikim ndërkombëtar të lëndëve narkotike, pastrim parash dhe pjesëmarrje në grup të strukturuar kriminal.
Emri i Bibajt është përfshirë në të njëjtën dosje hetimore me disa persona të tjerë, mes tyre Shpëtim Aliu, i njohur si “Salvadore”, Dritan Gjika, Denis Matoshi alias “Eldi Dizdari”, Nikoll Bibaj, Isa Aliu, Florjan Musaj, Naldi Yzeiraj, Armando Pacani dhe Oklid Aliu.
Sipas të dhënave të përfshira në dosjen e hetimit, Sokol Bibaj dyshohet se kishte një rol të rëndësishëm në organizimin e aktivitetit kriminal dhe se siguronte lëndën narkotike përmes Shpëtim Aliut. Ky i fundit është arrestuar në Rusi, pasi ishte shpallur në kërkim ndërkombëtar, ndërsa autoritetet shqiptare kanë nisur procedurat për ekstradimin e tij.
Një pjesë e rëndësishme e hetimeve mbështetet në komunikimet e zhvilluara përmes platformës së enkriptuar Sky ECC. Sipas SPAK, analizimi i këtyre komunikimeve ka ndihmuar në identifikimin e kontakteve dhe lidhjeve mes personave të dyshuar, ndërsa Bibaj përmendet në disa episode që lidhen me transportin dhe sigurimin e sasive të dyshuara të kokainës.
Në dosje është përfshirë edhe vëllai i tij, Nikoll Bibaj, i njohur me nofkat “Buci” dhe “Ujku”.
Një nga episodet e përshkruara nga hetuesit lidhet me një komunikim zanor të regjistruar më 31 maj 2020. Sipas përmbajtjes së dosjes, Sokol Bibaj i ka rrëfyer të vëllait se autoritetet kishin shpërndarë fotografinë e tij në Shkup dhe kishin arritur të identifikonin personin. Gjatë bisedës, ai ka folur edhe për një ndalim të mëparshëm, ndërsa ka pretenduar se të dhëna për të ishin përcjellë nga një ish-punonjës i strukturave që hetonin krimin e organizuar.
Në fokusin e hetimit janë pesë episode kryesore të dyshuara të trafikut të narkotikëve. Sipas versionit të SPAK, në drejtimin e grupeve të përfshira dyshohet se kanë qenë persona si Eldi Dizdari, Dritan Gjika dhe Armando Pacani, ndërsa Shpëtim Aliu dyshohet se kishte një rol të rëndësishëm në sigurimin e lëndës narkotike.
Hetimi i Prokurorisë së Posaçme shtrihet edhe te gjurmimi i të ardhurave që dyshohet se janë krijuar nga aktiviteti i paligjshëm. Sipas akuzës, një pjesë e parave dyshohet se është futur në Shqipëri në mënyrë fizike, pa kaluar përmes kanaleve bankare.
Më tej, këto të ardhura dyshohet se janë përdorur për investime në pasuri të paluajtshme dhe në aktivitete të ndryshme ekonomike, përfshirë kompani tregtare, ndërtim, hoteleri dhe shërbime konsulence.
Hetimet për dokumentimin e plotë të skemës, burimit dhe destinacionit të parave, si dhe rolin konkret të secilit prej personave të përfshirë, vijojnë.
