Një 20-vjeçar nga Kili ka humbur jetën tragjikisht pasi ra në një përrua në territorin grek, ndërsa po udhëtonte në këmbë nga Shqipëria drejt Greqisë.
Sipas autoriteteve greke, i riu ishte duke kaluar zonën e Mavromatit, në veriperëndim të Greqisë, së bashku me një mik 22-vjeçar, kur humbi ekuilibrin dhe përfundoi në përrua.
Në përpjekje për ta shpëtuar, në vendngjarje mbërritën ekipet e zjarrfikësve, të cilët pas kërkimeve arritën të nxirrnin trupin e tij pa shenja jete.
Miku i viktimës u ka deklaruar autoriteteve se të dy kishin zgjedhur të kalonin kufirin në këmbë nga Shqipëria drejt Greqisë, për shkak se kishin mundësi të kufizuara financiare dhe synonin të kursenin shpenzimet e udhëtimit.
Policia greke ka nisur hetimet për të zbardhur rrethanat e plota të aksidentit dhe për të përcaktuar se si ndodhi ngjarja fatale.
