Ndërsa autori i vrasjes së Ardian Nikulajt lëviz ende i lirë, rrjeti po zien për të dhënat dhe informacionet që jep policia. Kujtojmë se ditën e djeshme Policia e Shtetit njoftoi se ka gjetur motori e vrasësit të Ardian Nikulajt, portugezi Ruben Saraiva. Sipas njoftimit të policisë, motori u gjet pranë banesës së porositësit të kësaj vrasjeje, Edmond Haxhia.
“Si rezultat i hetimeve, informacioneve të siguruara dhe kontrolleve të imtësishme në terren të kryera nga shërbimet e Drejtorisë Vendore të Policisë Lezhë dhe forcat operacionale të Policisë së Shtetit, në afërsi të banesës së shtetasit të shpallur në kërkim E. H., në fshatin Kakarriq, shërbimet e Policisë gjetën dhe sekuestruan motomjetin e përdorur nga ekzekutori, për vrasjen e shtetasit Ardian Nikulaj”, thuhet në njoftimin e policisë.
Në fakt fotot e publikuara të motorrit të gjetur në Lezhë nuk ngjasojnë me motorin me të cilën lëvizte autori. Detaje të cilat janë evidentuar edhe nga qytetarët në rrjet tregojnë ndryshimet e mëdha që ka mes dy mjeteve.
Motori i autorit:
Motori i gjetur në Lezhë:
Sikur duket në dy foto me sipër motori që është fotografuar nga kamerat e sigurisë, me të cilin autori u largua nga vendngjarja, ka goma më të holla, është me palafrage, amortizatorët i ka me tub dhe marmita është e ngritur.
Ndërsa motori që u gjet në Lezhë, i ka gomat më të trasha, nuk ka palafrage, amortizatorët janë me sustë dhe marmitën e ka të drejtë. Gjithashtu edhe targat e motorëve nuk janë të njëjta.
Këto detaje na bëjnë të besojmë se motori i gjetur në Lezhë nuk është i vrasësit të Nikulajt dhe me sa duket policia duhet të bëjë kontrolle dhe verifikime më te hollësishme. Pasi gabime të tilla mund të çojnë prapa hekurave persona të pafajshëm.