Pasi fitoi shumicën dërrmuese të bashkive dhe kërkon një tjetër mandat në vitin 2025 si kryeministër, Edi Rama pritet të miratojë në parlament një ligj për vete, vartësit e tij dhe për biznesmenët e ndryshëm. Çdo politikan, zyrtar i lartë, prokuror, gjykatës, biznesmen apo oligark, mund të dhurojë te familjarët një banesë pa paguar taksa.
Ligji në fuqi parashikon një taksë prej 15% për çdo transaksion, qoftë ky edhe dhuratë për brezin e parë të familjarëve. Nisur nga viti i ardhshëm, çdo trashëgimi apo dhurim edhe brenda lidhjes familjare, përjashtohet nga tatimi prej 15% e vlerës së pasurisë.
Duke nisur nga viti 2024 për dhurimet dhe trashëgimitë deri në vlerën e 5 milionë lekë të reja për pasuritë e paluajtshme dhe 1 milion lekë për pasuritë e luajtshme, shteti do të arkëtojë zero të ardhura. Me pak fjalë, në 50 mijë euro vlerë banese, shteti siguronte afro 7500 euro taksa.
Zerimi i kësaj takse duket se nuk ka për qëllim të ndihmojë shqiptarët, të cilëve u duhen dy jetë për të blerë një shtëpi, por vetë politikanët dhe sojin e tyre. Qeveria nëse do të mendonte për shqiptarët do të ulte taksat për shtresën e mesme, të cilët paguajnë 23% të pagës mujore. Të pasurit në Shqipëri taksohen 8% për pasurinë e grumbulluar ndër vite me abuzime dhe tendera, e nëse shesin kulla taksohen me 6%.
Politikat e qeverisë janë diskriminuese për shqiptarin e mesëm dhe të varfër i cili nuk ngre dot kokë nga taksat dhe vështirësitë ekonomike. Ndërkohë u falen taksat të pasurve që duhet të tatoheshin një më një për pasurinë që kanë vënë në kurriz të shqiptrarëve, duke shfrytëzuar resurset natyrore dhe nëntokësore të këtij vendi.
