Ferdinand Porsche themeloi kompaninë e tij të makinave në Shtutgart në 25 prill 1931. Financuar nga bashkëthemeluesit Anton Piëch dhe Adolf Rosenberger, Ferdinand Porsche kaloi dy dekadat e ardhshme duke projektuar makina për kompani të tjera (si dhe për Hitlerin). Makina e parë e markës Porsche nuk u nxorr për shitje deri në vitin 1948.
Ferdinand Porsche lindi në vitin 1875 në atë që sot quhet Republika Çeke. Ai ishte i treti nga pesë fëmijët e lindur nga Anton dhe Anna Porsche. Babai i tij ishte hidraulik dhe ai e mësoi zanatin kur u rrit, duke shpresuar që një ditë të merrte përsipër biznesin e familjes pas vdekjes së vëllait të tij të madh. Por kundër dëshirës së babait të tij, Porsche shkoi në rrugën e tij. Ai ngriti një punishte ku eksperimentoi me energjinë elektrike dhe pasi mbaroi shkollën dhe mësimin e hidraulikut, u punësua në kompaninë elektrike Bela Egger & Co. në Vjenë.
Aftësitë e tij arritën në atë nivel, saqë shtëpia e tij ishte e para në zonë që kishte drita elektrike dhe zile. Ky talent dhe prejardhja e tij në elektricitet do të bëheshin themeli mbi të cilin mbështeteshin shumica e inovacioneve që karakterizuan karrierën e tij. Makina e parë që ai krijoi ishte një automjet hibrid, elektrike dhe me benzinë, i cili njihej si Lohner-Porsche Mixte dhe u prezantua në vitin 1898. Si makina e parë e prodhuar në masë që kombinonte këto dy burime energjie, ajo u prodhua nga viti 1900 deri në vitin 1905.
Në vitin 1902, Porsche u bashkua me ushtrinë dhe kur mbaroi shërbimin, ai kaloi 25 vjet duke punuar për industrinë e makinave në Austri dhe Gjermani. Gjatë kësaj kohe, ai punoi me Austro-Daimler, Mercedes-Benz dhe Auto-Union. Ai projektoi makinën e tij të fundit për Mercedes në 1927. Ai themeloi kompaninë e tij në vitin 1931, kur ishte 55 vjeç, për të ofruar shërbime konsulence të projektimit dhe inxhinierisë për prodhuesit e automobilave. Kjo kompani nuk prodhonte makina nën markën Porsche.
Kur në panairin e makinave në Berlin të vitit 1933, Hitleri i sapoardhur në pushtet njoftoi planet e tij për të vënë Gjermaninë në rrota, Porsche do të luante një rol të madh në to. Pjesa e parë e planit ishte krijimi i një makine popullore dhe e dyta ishte zhvillimi i një programi garash të subvencionuar nga qeveria. Në qershor 1934, Porsche fitoi kontratën për të ndërtuar makinën e popullit, duke hapur rrugën për krijimin e Beetle legjendar të Volkswagen.
Porsche ishte gjithashtu i përfshirë në pjesën e dytë të planit të Hitlerit, si këshilltar i Mercedes dhe Auto Union për prodhimin e makinave të garave, të cilat synonin të promovonin Gjermaninë si një superfuqi automobilistike.
Gjatë Luftës së Dytë Botërore, Porsche projektoi tanke dhe automjete të tjera për ushtrinë gjermane.
Pas dorëzimit të Gjermanisë, ai u arrestua për krime lufte dhe u mbajt në burg për 22 muaj. Thuhet se djali i tij, Ferry Porsche, ka mundur të blejë lirinë e tij. Megjithatë, ai u lirua përfundimisht nga akuzat e ngritura kundër tij nga francezët. Ndërsa ai mbeti në burg, djali i tij filloi punën në 356/1, makina e parë që mbante emrin Porsche. Dhe në vitin 1948, Ferdinand së bashku me djalin e tij, Ferry, themeluan Porsche AG, kompaninë e automobilave që njohim deri më sot.
356 hyri në prodhim në vitin 1948, dhe megjithëse vetëm 50 makina të tilla u shitën nga fabrika atë vit, deri në vitin 1956, do të ndërtoheshin më shumë se 7000. Në kohën kur Porsche 911 zëvendësoi 356 në 1965, prodhimi kishte arritur në 76,000 makina. Rreth gjysma e këtyre makinave mbijetojnë deri më sot.
Ferdinand Porsche vdiq në moshën 75-vjeçare në vitin 1951 në Shtutgart. Sot, Porsche është në pronësi të Volkswagen./ Moneyreview
