A është e sigurtë fëmijëria e fëmijëve tanë në dyqanin e lagjes apo dyert e kopshteve publike? Një denoncim i ri i mbërritur nga një prind ngre alarmin për një situatë mjaft të çuditshme dhe potencialisht të rrezikshme që po ndodh rregullisht pranë kopshtit Nr. 18, në afërsi të shkollës “Mihal Grameno” në Tiranë.
Sipas dëshmisë së prindit, një grua e re në moshë po shfaqet në mënyrë të përsëritur pranë ambienteve ku qëndrojnë fëmijët, duke përdorur taktika të qarta për të fshehur fytyrën dhe për t’iu shmangur syrit të kalimtarëve. Ndjekja apo vëzhgimi i kopshtit nuk është një rast i izoluar, por një sjellje e përsëritur që ka filluar që nga dita e parë e vitit të ri akademik. Prindi shprehet se është përballur me zonjën ditën e djeshme dhe sot ku ajo mbante të njëjtën veshje
“E kam parë për herë të parë më 1 shtator 2026, ditën e parë të kopshtit. Më pas përsëri nga mesi i muajit pas portës, dhe sot sërish,” tregon prindi i shqetësuar. Dëshmitari përshkruan se si sot gruaja mbante një shami në kokë, pantallona të verdha dhe përdorte një çadër të hapur vetëm për të mbuluar fytyrën ndërsa qëndronte mbi trotuar pranë pallatit tjetër, duke u marrë me telefonin.
Ajo që e bën edhe më shqetësuese këtë situatë është reagimi i saj fshehës: posa vëren se po vëzhgohet nga prindërit që tërheqin fëmijët, ajo ndërron rrugë apo fshihet pas çadrës, por pa u larguar përfundimisht nga rrethimi i kopshtit.
Pavarësisht nëse bëhet fjalë për një person me probleme të shëndetit mendor apo për një qëllim më të errët vëzhgimi, prania e saj e vazhdueshme dhe vënia e inskenuar e shamisë apo çadrës prapa portave të kopshtit përbën një shqetësim të madh për sigurinë e të vegjëlve.
Prindërit kërkojnë ndërhyrjen e menjëhershme të Policisë së Shtetit dhe Policisë Bashkiake për të verifikuar identitetin e këtij personi dhe për të rritur praninë e patrullave në orët kur fëmijët hyjnë e dalin nga kopshti Nr. 18. Siguria e fëmijëve nuk mund të lihet në dorë të rastësisë apo të pritet që të ndodhë ndonjë incident për të reaguar!
