Kryeministri Edi Rama ditën e sotme vendosi të vizitojë dy shkollat e reja 9-vjeçarja “Vaçe Zela” dhe e mesmja “Kristo Frashëri” në njësinë 9 dhe 11 në Tiranë. Numri një i qeverisë paralajmëroi ndryshime të rëndësishme gjatë mandatit të tretë ku midis të tjerash theksoi se bari në ambientet e shkollave do të zëvendësohet me mbjelljen e produkteve bujqësore.
Sipas tij, vetëm në këtë mënyrë nxënësit do të shkëputen nga teknologjia dhe vetëm kështu do të kuptojnë vlerën e vërtetë që dhuron natyra dhe toka.
Edi Rama:
“Nuk mund të ketë hapësira rreth e rrotull shkollës që rrinë kot. Ndërsa i parcelave bujqësore në shkolla duhet të bëhet realitet, gjithë këto hapësira brenda shkollave nuk mund të jenë hapësira me bar, bari është i bukur por bari kërkon mund të madh për mirëmbajtjen e vazhdueshme. Këtu brenda mureve të shkollave ka vend për kultivimin e perimeve për t’i dhënë mundësi nxënësve të kenë kontakt dhe të kenë dijeni fillestare për tokën dhe vlerat e saj. Të dinë çfarë mund të dalë nga toka dhe pastaj pak nga pak të krijojnë modestish sipërmarrjen e shkollës, ato produkte që do të dalin nga këto parcela. Sigurisht që kjo nuk do të vlejë për biznes sepse bëhet fjalë për sasi të vogël por për të mësuar edhe pjesën e tregtimit të produkteve do të ishte një laborator natyror fantastik. Fëmijët përveç jetesës me Iphone dhe PC të kenë edhe kontaktin e drejtpërdrejt me natyrën dhe tokën”, tha Rama.
